Shillong, K’lyngkot 25: U Symbud Myntri Rangbah ki kam pohiing (police) Bah Prestone Tynsong ha ka sngi Thohdieng, ula maham ba ka por kan sa poi ba ka jingkhang ban iakren iasuk bad ka seng Hynniewtrep National Liberation Council (HNLC) kan sa khangdam noh.
Haba jubab ia ka jingkylli halor ka jingbym jubab ka HNLC ia ki jingiai kyrpadka Sorkar ban wan iakren iasuk biang, u Bah Prestone ula ong “Lada kim (HNLC) shimkhia ban jubab ia ki jingkyrpad jong ngi, ngam lah ban ong eiei hynrei ai ba ngan pynkynmaw hangne ba ka jingkyrpad kam shym wan tang na ka Sorkar Jylla marwei, ka jingkyrpad kala wan ruh na ka Sorkar Pdeng. Kumta, ka pork a dang don bad ka jingkhang ka dang plie ia ki ban wan phai biang sha ka jingiakren iasuk”.
Haba ong ia kane, u Symbud Myntri Rangbah ula maham “Hynrei ka por kan sa poi ba ka jingkhang kan sa khang noh bad kan sa buh ia ki ha ka jingeh. Kumta, nga kyrpad ia ki ba kin pyrkhat bha ia kane. Naba ka jingkhang ka dang plie, kan bha ia ki ban wan shakhmat sha ka miej jingiakren”.
Kala iaid la palat shisnem naduh ba ka HNLC kala weng noh ialade na ka jingiakren iasuk ba lai mamla ha u Kyllalyngkot 2024 halor ka jingkynnoh ba ka Sorkar kam shym la lah ban leh eiei halor ki san tylli ki mat jingdawa ba kongsan jong ka, kaba kynthup ia ka jingmap noh ia baroh ki kam bymman pyrshah ia ki Nongialam bad ki dkhot.
Haba kynthoh ia ka jingkynnoh ka HNLC ba ki Pulit kila pyndonkam ia ki SHNLC pyrshah ia ka seng bad ia ka iaid ka ieng kum ka jingkynnoh ba khlem nongrim bad ba shu thok, u Bah Prestone ula ong “Kane ka dei namar ngi la don ia ka Tnad Pulit kaba treikam 24×7 bad kiba la hikai pynthit bha nalorkiba la kut jingmut ban pynthikna ia ka jingshngain jong iwei pa iwei I nongshongshnong ka Jylla”.
Haba kyntait ban kynthoh ia ka manifesto ba dang shen bala pyllait da ka HNLC, u DyCM ula ong “Ka shong ha ki paid bah ba kin bishar hynrei ka kamram jong ka Sorkar ka long ban pynthikna ia ka jingshngain jong baroh ki Nongshong shnong ka Jylla bad ki briew kiba wan na shabar kynthup ki nongsengkam nalor ban pynthikna ia ka jingpynneh ia ka shongsuk shongsain”.
 Bah Prestone Tynsong ha ka sngi Thohdieng, ula maham ba ka por kan sa poi ba ka jingkhang ban iakren iasuk bad ka seng Hynniewtrep National Liberation Council (HNLC) kan sa khangdam noh.){kind=link}