Agartala, Jymmang 01: U Myntri Rangbah (CM) ka Tripura u Manik Saha hynnin ka sngi U Blei u la maham ba ka kynhun Special Task Force (STF) kan shim ka jingpynshitom kaba tyngeh pyrshah ia ki kynhun runar sain hima kumjuh ia ki kynhun nonglute kiba don hapoh ka seng BJP.
Haba kren sha ki lad pathai khubor, u Manik Saha u la ong, “Na ka liang ka sorkar bad ka party BJP ki la iai bteng ban kyrpad bad maham ia kito kiba leh ia ki kam beain bad kam bymman. Ka kynhun STF ba la thaw kyrpang hapoh jong ka tnat Crime Branch kan shim da ki sienjam kiba tyngeh pyrshah ia ki.”
U CM u la ong ba na ka liang ki bor sorkar ki dang iai bteng ban ioh pdiang ia ki jingujor naduh ba la pynlong ia ka Assembly election ha u bnai Rymphang ba la dep. “Ka sorkar jylla bad ka party ka bteng ban kyrpad ia kito ki nongkyrshan ba shah ialam bakla ban pynkut mardor ia ki kam beain, ” Ong shuh shuh u CM ka jylla.
Na ka liang u kubur ba ki don katto katne ki nongtrei ka party BJP kiba shah ialam bakla da kaba leh ia ki kam pyntriem, ha kaba u la maham ban leh da kaba tyngeh.
Kane ka jingkren ka jong u ka long beit beit halor ka jingujor da ki party liang pyrshah halor ki kam thombor kiba thmu khnang, ki kam pyntieng pynsmiej bad ki kam lute da ki katto katne ki nongtrei kiba don hapoh ka party synshar.
