Shillong, Iaiong 08 : U Myntri Rangbah ka Jylla Conrad K Sangma ha ka sngi Ba-ar, ula niew ia ka jingiakhih ba dang shen ha North Eastern Indira Gandhi Regional Institute of Health & Medical Science (NEIGRIHMS) kum ka kam ka bym lah ban pdiang bad kular ba ka Sorkar ban leh eiei kat kum ka lynti ka ain pyrshah ia ki briew kiba donkti ban pynthut ia ka jingtreikam ka Hospital.
Kane ka jingkynthoh u Myntri Rangbah kala mih hadien ka jingleit iakhih jong ka seng HYC bad jingkhang tala ia ka Ophis u Director ka NEIGRIHMS, halor ka jingkynnoh ba kane ka Institute kam shym la lah ban pynbeit ia ki kam kiba iadei bad ka thungkam thungkam.
Haba iakren bad ki nongthoh khubor, u Conrad ula ong “Nga shim (ia ka jingiakhih ba dang shen) kum ka kam ka bym lah ban pdiang. Wat ha ka por thma ka don da ka jingbiew burom ba ki shipai jong kano kano ka ri kim lah ban hiar thma ia ki hospital. Nga sngewsih bha ban iohi ba ka jingtreikam jong ka hospital la wan ban tuklar bad kam pher la ka dei ka daw aiu aiu ruh, haba kut ka sngi, lada phi leh ia kine ki kam, ki dei ki paidbah bad ki nongpang ki ban jynjar bad na ka jingsngew para briew, kane ka dei kaei kaei ka bym lah ban pdiang. Nga kren shai halor kane”.
“Ki lah ban don ki daw, ki lah ban don ki jingiapher jingmut hynrei ki don ki lynti ban pynbeit ia ki” ula ong.
“La ka dei ka Sorkar Jylla ne ka Sorkar Pdeng lane kano kano ka Institute kim ju kiar na kano kano ka jingiakren haba mih kino kino ki ishu bad ngi la pynshisha ia ka bad ngi la pyni ruh ha ki por bala leit noh bad ngin iai bteng ban iakren hadien habud hynrei ban leit tuklar bad ban shu pynthut ia ka jingtreikam ka hospital ka dei ka bym pat ju leh mano manor uh” ong u Myntri Rangbah.
“Kumba nga ong, ngam mynjur ia kane bad kumba nga ong ki Pulit kila shimkhia ia kane na ka lynti jong ka ain bad kila dep ban register ia ka case bad ki Pulit kila shim ia ki sienjam kat kum ka ain bad kat kum ki sakhi kiba ioh lum ngin sa leh eiei pyrshah ia ki briew kiba donkti” ula bynrap.
U Myntri Rangbah ula ong “Kumba nga ong, ngim ju kiar ban iakren ia kino kino ki ishu, ngam ong ba ki ishu ba ki wanrah ka dei ka bym donkam lane ba donkam hynrei kane kam pynksan ban shu leit tuklar ia ka jingtreikam jong ka hospital bad lada don ki jingsngewkhia, ki don kiwei pat ki lynti ban iakren hynrei ban shu pynsangeh ia ka jingtreikam ka hospital kam dei satia ka lynti”.
 kum ka kam ka bym lah ban pdiang bad kular ba ka Sorkar ban leh eiei kat kum ka lynti ka ain pyrshah ia ki briew kiba donkti ban pynthut ia ka jingtreikam ka Hospital.){kind=link}