Itanagar, Nohprah 15 :U Myntri Rangbah (CM) ka Arunachal Pradesh u Pema Khandu ula shimkhia jur ha kaba iadei bad ka jingiakynad hapdeng ki bor shipai ka India bad ka China kaba la jia ha ka 9 tarik mynta u bnai da kaba ong ruh ba kam dei shuh ka snem 1962, bad ba ki shipai India kin pynphai kylliang da kaba tyngeh ia kino kino kiba pyrshang ban wan rung jubor.
“Ka Yangtse ka dei kaba hap hapoh ka assembly constituency ka jong nga, bad man ka snem Nga leit ban iakynduh ia ki shipai bad ia ki nongshong shnong ha katei ka jaka, mynta ka dei shuh ka snem 1962. Lada don kiba pyrshang ban wan rungtuh, ki shipai ba shlur jong ngi kin pynphai da kaba tyngeh,” pynpaw u CM lyngba ka Twitter.
Ha kawei pat ka bynta, na ka liang u Myntri Iada ri u Rajnath Singh ula ai ka jingpynshai hapoh Lok Sabha ha kaba iadei bad katei ka jingiakynad bad ong ruh ba ka China kala iai bteng ban pyrshang pynkylla ia ka status quo hapoh Arunachal, hynrei na ka liang ki shipai India kila pynbor ia ki ba kin randien sha shiliang khappud. “Kam shym la don kano kano ka jingiap ne ka jingmynsaw jur sha ki bor shipai ki jong ngi.Nalor kata la kyntu ruh ia ki shipai ka China ba kin kiar na kiba kum kine ki jingpyrshang bad ban pynneh ia ka shongsuk shongsain ha ki jaka khappud,” ong u Rajnath Singh.
Ki bor shipai ka India bad ka China kila poi sha ka jingialeh markylliang ha ki bynta jong ka Tawang sector ka Arunachal Pradesh ha kane ka taiew ba la lah, kata ka jingjia jong ka jingialeh markylliang kaba nyngkong hapdeng kine ki ri ba marjan naduh ka jingiakynad kaba shyrkhei kaba la jia ha Galwan vallye kaba la jia ha u bnai Jylliew 2020. Ha katei ka jingjia kaba dang shen hynriew ngut ki shipai India kila ngat ha ki jingmynsaw ia kiba la pynkynriah noh shapoh ka hospital shipai ha Guwahati.
“Ha ka 9 tarik mynta u bnai, ki shipai PLA kila pyrshang ban jam sha ki bynta jong u LAC ha ki bynta jong ka Yangste kaba hapoh Tawang sector da kaba pynkhein ruh ia ka status quo.Hynrei, ia kane ka jingpyrshang jong ka China la aireng da ki bor shipai ki jong ngi ha ka rukom kaba biang.Kane ka jingiakynad ka la lam ruh sha ka jingialeh kaba marmet ha kaba ki shipai ka India da ka jingshlur kila lah ban khanglad ia jingpyrshang wan tur jong ki shipai PLA sha ki bynta u pud u sam jong ka ri bad kaba la pynlong ia ki ba kin randien noh sha la ki jong ki jaka shong,” ong u Rajnath Singh haba kren halor kane ka mat hapoh ka dorbar Parliament.
