Shillong, Jymmang 02 : Ka Tnad Meghalaya Police kala pynmih ia ka jingbthah ba maham ia ki samla pule Kynthei ba dang ap result HSSLC ba kin phikir bha ialade ban lait na ka jingpynngop jong ki nongshukor aikam.
Kane ka jingmaham kala mih hadien ka jingioh khubor ia ka jingdon ki nongshukor aikam ‘Air Hostess’ ia ki katto katne ki samla pule kynthei ba dang ap result HSSLC.
Ki Pulit ki pyntip ba kine ki nongshukor ki pyndonkam ia ka buit da kaba phone lane phah SMS sha ki samla pule, da kaba kam thok ba kila shah jied ban long “Air Hostess” watla kine ki samla kim shym la aplai ia ka kam.
Ka Tnad Pulit kala kyntu ia ki samla pule bad ki Kmie Kpa ban phikir bad peitngor bha na kine ki kam thok kam shukor.
Kala kyntu ruh ba kin ai jingtip mar mar sha ki Pulit haba ioh pdiang ia ki phone call ne ki SMS, kynthup ki phone number jong ki briew ba phah.
