Shillong, Rymphang 05: Ka Tnad Pulit kala maham ia ki paidbah ba kin long kiba husiar bha namar ka jingmih sa ki riew runar kiba ak kum ki agent jong ki nongrah tiar kum ka FedEx bad ak ruh kum ki Custom, CBI, NCB bad kiwei, tang ban ioh shukor pisa.
Kane ka jingmaham kala mih na ka Ophis u Superintendent of Police ka East Khasi Hills District.
U Superintendent of Police (City) Bah Vivek Syiem u pyntip ba ki Pulit kila ioh jingtip ba ki don ki riew shukor kiba ak ialade kum ki agent jong ki courier service kum ka FedEx bad phone ia ki briew ba ki ishan khmat ban pyntip ba ki tiar ba ki phah wanrah ki don ia ki jingdih pynbuaid.
Nalor kane, kine ki riew shukor ki ju pyndonkam ruh ia ka kyrteng jong ki Central Law Enforcement Agency kum ka Custom, CBI, NCB bad kiwei, kiba pyntip ba ia ka kyrteng jong kine ki briew la pyndonkam ruh ha ki kam buhrieh ia ka thymmai jong ka pisa ba kamai beain bad ba hap ban phah bun bah ka pisa sha ka Account kaba ki kam ba ka dei ka RBI clearance.
U Bah Vivek u ong ba khnang ban pyntieng ia kine ki briew, ki ju byrngem ruh ban kem ha kiba bun ki khep. Ki don ruh ki khep, ba ki bthah ban register online ia ki jingujor lyngba ki application kum ka any desk bad kiwei, kaba lah ban pyndonkam pat ha kaban shukor ia ki briew ki bym bna eiei.
Une u Heh Pulit ula kyntu ia ki paidbah ba kim dei ban download ia kino kino ki application bala bthah lyngba ka jingkren phone jong ki briew ki bym ithuh.
La bthah ia ki paidbah ba kin pynthikna ia ki phone call ba ki iohpdiang halor kino kino ki tiar ba wan poi khlem da phah wanrah. La kyntu ruh ba lada don kum kine ki jingjia ba kin pyntip mar mar sha ki Police Station ba kan pynthikna bad ba ki Pulit kin lah ban leh eiei.
U ong ba ia kane ka kam lah ruh ban ai jingtip sha ka Cybercrime helpline number 1930 bad ruh sha ka Police Control Room, Shillong ha u 0364-2215427 bad 6009196479.
