Shillong, Lber 11 : Ki bor district ka South West Garo Hills kala khang ia baroh ki nongtrei Sorkar ba kin pynmih sa phriang ia ki khubor, dur lane ki video kiba lah ban aiding shuh shuh ia ka jingsngew iapher jaidbynriew katba ka jingiakynad bad jingkulmar namar ka elekshon GHADC, ka nang jur ha ka district ba marjan.
Ka Deputy Commissioner Anandya Raajsshre kala pynmih ia ka hukum ha ka sngi Balang ba bthah ia baroh ki khlieh jong ki Tnad treikam ba kin pynthikna ba ki Nongtrei kin kham tyngkai haba pyndonkam iala ki jong ki social media account.
Ka hukum ka ong ruh ba ki nongtrei Sorkar ki dei ban kiar na ka jingpynmih lane kynthoh halor ki jingkulmar kiba jia ha kiwei ki district lane jylla ha ka rukom kaba lah ban pynshit ia ka jingsngew u paidbah, lane aiding hapdeng ki kynhun jaidbynriew ha ka imlang sahlang, kaba lah ban nang pynheh ia kaei kaba jia ba long mynta.
Kane ka jingbthah ka treikam ia baroh ki Ophis ha South Garo Hills bad la bthah ia ki Khlieh jong kine ki Ophis ba kin pynthikna ba ki nongtrei jong ki kin bud pyrrkhing ia ka jingbthah.
Ka hukum ka maham ruh ba kano kano ka jingpynkhein, kan khring ia ka jingpynshitom kat kum ki ain kiba don nalor ka jingpynshitom kat kum ka Meghalaya Civil Services (Discipline & Appeal) Rules, 2019.
