Shillong, Jylliew 15 : Ka Sorkar Jylla kala ai ka jingmaham ban leh tyngeh ia ki Nongtrei Sorkar, kiba leit ban iashimbynta ha ki jingialang paidbah ne kino kino ki jingialang kiba pynlong da ki seng sain pyrthei.
Ia kane ka hukum la pynmih da ka Commissioner & Secretary ka Tnad Personnel & AR (A) Kong R Lyngdoh ha ka sngi Balang.
Kat kum kane ka hukum la ong “Kala poi sha ka jingtip jong ka Sorkar ba ki don bun ki Nongtrei Sorkar kila la ioh ia ka jingleit iashimbynta lane leit sngap ia ki jingialang bala pynlong da ki seng sain pyrthei kaba long ka jingpynkhein ia ka Rule 20 (1) jong ka Meghalaya Services (Conduct) Rules, 2019”
Ka ong ba kat kum kane ka Rules la kren shai ba “ Ki Nongtrei Sorkar kim dei ban long ki dkhot lane don jingiadei bad kino kino ki seng sain pyrthei, lane bad kine kino ki seng kiba iashimbynta ha ka kam sain pyrthei, lane kaba ki kam ki dei kiba khlem kam sain pyrthei lane ba un/kan iashimbynta lane kyrshan ha kano kano ka dur, ha ki movement ki seng sain pyrthei bad kiwei kiwei”.
Ka hukum kala ong “La iai ban bad ban jur ia baroh ki Nongtrei Sorkar ba kin bat ia kane ka Rule kumba ka long bad ban kiar ialade na ka jingleh ia kine ki kam kiba long pyrshah ia ka Sorkar. Kino kino ki Nongtrei Sorkar kiba la slem ba ki ialeh pyrshah ia kine ki jingbthah kin shah khring ha ki sienjam ba tyngeh jong ka Sorkar kat kum ki jingbthah ka Rule 20 jong ka Meghalaya Services (Conduct) Rules, 2019”.
Kane ka hukum kala bhah ruh ia baroh ki Administrative Department/ Head of Department ba kin pyntip ia kane ka hukum sha baroh ki Ophis ha ki District bad ki Block ba kin pyntrei pyrrkhing bha.
