Nongstoiñ, Jylliew 6: Ka shnong Tiniang ryngkat ka jingïatreilang bad ka seng KSU Tyniang Unit bad ka Seng Samla Shnong Tiniang, kila maham jur ia ki briew kiba wan pynjaboh bad bret bilor kyiad ha ka Wah Rwiang.
Kane ka jingmaham kala mih hadien ba kine ki kynhun kila hiar jurip ia kane ka wah, kaba la pynlong ruh halor ka jingioh pdiang iaka jingujor bad ka jingshha kren pynjah burom ka Shnong namar ka jingbret pathar ki briew ia ki bilor kyiad bad kiwei kiwei ki jakhlia ha ka wah.
Hadien kane ka jingjurip, ka kynhun ka la lap shibun ki jaboh jabaiñ ki la sdang ban bun ha ki rud wah jong katei ka Wah, khamtam eh ki bilor kyiad kiba la pynpait dusmon.
La ong ruh ba kitei baroh ki dei ki jingleh pathar jong kito kiba ju leit khwai ha katei ka wah, kiba ju mlien ban rah kyiad bad hadien ba ki la dep ban dih, ïa ki bilor kyiad la shu bret kat shaba lap.
Kine ki Kynhun ki la maham tyngeh ba nangne shakhmat yn ym shah shuh ïano ïano ruh kiba leit khwai ha katei ka Wah ba kin rah ïa kino kino ki jingdih pynbuaid bad ban shong palat ïa ka por kaba la buh ryntih da ka shnong naduh mynta ka sngi. Kata ka long haduh 4 baje janmiet ha ka por tlang bad 7 baje janmiet por lyiur.
Ha katei ka sngi la ïadonlang u samla Philbak Marshillong Secretary Seng Samla Shnong Tiniang, u samla Rijit Roy Marshillong Environment Secretary KSU Tiniang Unit bad u bah Kyrshanbor Marshiangbai Sordar Shnong Tiniang bad kiwei kiwei.
