Shillong, Lber 20 : Ka Khasi Students’ Union (KSU) ha ka sngi Palei kala pynpaw ba da ki hajar ngut ki dkhot ka seng kim salia satia ban rung along lad aka Sorkar Jylla ka nud ban leh da kaba bor ha kaban wanrah ia ka lynti rel ha ri-lum Khasi Jaintia kat bym pat don ki ain khang mynder kum ka Inner Line Permit (ILP).
“Katba ngi dang iakhun ban ioh ia ka ILP, kynsan kynsan kila wanrah ia ka jingtyrwa ban pyniasoh lynti rel. Kumta, ngi phah ia ka khubor kaba jam bad ba shai ba wat ju pynbitar ia ka KSU namar ngi kwah ban pyntreikam mardor ia ki ain kiba khlain ki ban iada ia ka hok bad ka bha ka miat ki paid Khasi” ong u President ka KSU samla Lambokstar Marngar haba kren ha ka jingialang ban rakhe ia ka jingdap 47 snem jong ka Seng.
Ula maham ruh “Lad aka Sorkar ka nud ban leh da ka bor, ka dei ruh ban long kaba la khreh ban pynheh ia ki District Jail bapher bapher namar da ki hajar ngut ki dkhot ka KSU ki long kiba la khreh ban leit sha along. Ka KSU kam don por ban shu heh tyngam ha ki social media, ngi bunkam ban iakhun ha madan na ka bynta ban iada ia ka Jaidbynriew Khasi”.
U Bah Lambok ula ong ba ka Sorkar Jylla kala dep mynjur ia ka resolution ban pyntreikam ia ka ILP hynrei sngewsih ba kane ka kam ka shu sahteng ha ka jingshim rai ka Sorkar Pdeng.
Ula buh jingkylli ruh ia ka jingbym lah jong ka Sorkar Jylla ban pyntreikam ia ka Meghalaya Residents Safety and Security Act (MRSSA), 2016 bad ong “Ki paidbah kim dei ban shu kylli kaei kaba ka KSU kala leh ban iada ia ka Jaidbynriew Khasi hynrei ki dei ruh ban kylli ia ki nongthaw ain ia kaei kaba kila leh halor kane haba la jied ia ki ban thaw ia ki ain na ka bynta ban iada ia ki jaidbynriew trai jylla”.
U President ka KSU ula pynkynmaw ruh ba ka dei ka lynti iaid kaba bun ki jingtynjuh ia ka seng ha kine ki 47 snem bala leit noh bad ong “Ngi la mad ia shibun ki jingtynjuh haba ngi shim ia kino kino ki mat kiba ktah ia ki Jaidbynriew trai Jylla”.
Ula kynnoh ba ka Sorkar la ka dei ka Sorkar Jylla ne Sorkar Pdeng, kila pyrshang bun sien ban phiah ia ka KSU.
“Ha u 2007-2009 kila don ki jingpyrshang ban phiah ia ka KSU namar ka kam tih Uranium ym tang da kaba pyndonkam da ka pisa hynreiwat haduh u pud ban pyrshang shim ia ka jingim ki nongialam ka KSU. Kumta, ngi wan hangne ban pynkynmaw ia ka KSU ha kine ki 47 snem ba ka shakri, kala ieng skhem ha ka ningrim ban iada ia ka hok bad ka bha ka miat jong ka Jaidbynriew”.
Ka KSU ka dei ka seng kaba la thaw ha ka 20 tarik Lber, 1978 da ka kynhun ki samla pule kiba kwah ban wanrah ia ka jingiatylli hapdeng ki samla pule Khynriam, Pnar, Bhoi, War, Maram, Lyngngam bad kiwei kiwei.
 ha ka sngi Palei kala pynpaw ba da ki hajar ngut ki dkhot ka seng kim salia satia ban rung along lad aka Sorkar Jylla ka nud ban leh da kaba bor ha kaban wanrah ia ka lynti rel ha ri-lum Khasi Jaintia kat bym pat don ki ain khang mynder kum ka Inner Line Permit (ILP).){kind=link}