Shillong, Rymphang 14 : Ka Khasi Students Union (KSU)-NEHU Unit, kala maham tyngka ia ka Director jong ka English & Foreign Language University (EFLU), Shillong Campus, Dr Mousmumi Guha Banerjee halor ka jingkynnoh ba ka niewbein ia ki samla Khasi ba pule ha kane ka University.
Ka KSU kala kynnoh ba ka Dr Mousumi kala leh shiliang khmat bad iuhroit ia ka hok jong ki samla pule Khasi ha kane ka University. Kala kynnoh ruh ba ki samla pule riewlum kila hap ban mih na ka University hadien ba pyndep ia ka jingpule namar ka jinglong ong kane ka Director, ka bym lah ban iai shah hateng hateng.
Ka Kynhun ki Nongialam ka KSU kila iakynduh ia kane ka Director kaba dei ruh ka Associate Professor ka EFLU ha ka 13 tarik Rymphang. Ha kane ka jingiakynduh, ka Dr Mousumi kala kyntait ia baroh ki jingkynnoh bala pynmih da ki Samla.
Hynrei haba ki Nongialam ka KSU kila buh jingkylli balei ba bun na kiba ieh shiteng por ia ka jingpule ki dei ki Khasi bad baroh ki dei na ka Tnad Pule jong ka, kane ka Director kam shym la lah satia ban jubab.
Ka KSU kala maham tyngeh ia ka Dr Mousumi ba lada kane ka jingleh jong ka, ka nang iai jia hadien habud, ka Union kam don lynti pat da kumwei hynrei ban ujor pyrshah ia ka kat kum ki lynti ka ain.
