Shillong, Jymmang 29 : Ka India Meteorological Department (IMD) kala pynmih ia ka jingmaham ban ther u slap bad syllad ka lyer ha kylleng ki District ka Jylla Meghalaya, ka ban sdang naduh mynta ka sngi bad neh haduh ka 2 tarik u Jylliew.
La kyntu ia ki nongshongshnong ha baroh 12 tylli ki District ka Jylla ba kin phikir bad shim ia ki lad jingiada namar ka thain kan mad ia ka jingsyllad ka lyer kaba jur, ka jingpom pyrthat bad ka jingther u lapbah.
Kat kum ka khubor ba san sngi bala pyllait hynne shiteng sngi, la khmih lynti ia ka lyer kaba iaid lynti hapdeng 40-50 kmph bad kiew haduh 60kmph ha kylleng ki District kynthup ha East Khasi Hills, West Jaintia Hills, South West Khasi Hills bad East garo Hills. Kine ki district la batai lypa ba kin ioh ruh ia u slap uba jur ha ki katto katne ki jaka ha kine ki arsngi ban wan.
Hapoh ka 31 tarik Jymmang, ka suinbneng ka lah ban kylla sha ka jingjur ka jingpom pyrthat uba wan ha ryngkat ka leilieh bad ka lyer kaba iaid lynti hapdeng 30-40 kmph, ka ban ktah ia ka Ri-lum Khasi bad Garo bad kumjuh ruh ia ka Ri-Bhoi bad ka Ri-lum Jaintia. Ka jingther u slap ka lah ban bteng khlem sangeh ha ki sngi sdang jong ka taiew ban wan, kaba pyn khuslai ia ka jingpoi ka umsaw, ka jingtwa khyndew bad jingjulor ki jingtei.
Ki District kiba hap peitngor bha :
East & West Khasi Hills, South West Khasi Hills : Ka jingbatai lypa ka pyni ia ka jingther u slap kaba lah ban poi ruh sha u lapbah.
East Garo Hills & East Jaintia Hills: La khmih lynti ba kin dei kiba shah ktah jur eh ha ka lyer kaba jur bad u slap ba jur.
Ri-Bhoi & West Jaintia Hills: Ka lah ban mad ia ka lyer kaba jur bad u lapbah ha baroh kine ki sngi.
Kane ka jingmaham ka treikam manla ka sngi naduh ka por 8:30 baje mynstep IST haduh 8:30 baje mynstep jong ka sngi kaba bud. La kyntu ia ki nongshongshnong ba kin kiar na ka leit jingleit, pynskhem bha ia ki tiar ki tar ba shong synjor shabar bad ban buddien ia ki khubor suinbneng.
