Maham ka HNLC ia u CEM ka KHADC |Dawa pyndam ban ithuh ia ka Majai kum ka Raid

Shillong, Naitung 04 : Ka Hynniewtrep National Liberation Council (HNLC) kala maham ia u Chief Executive Member (CEM) ka Khasi Hills Autonomous District Council (KHADC) haba dawa ba u dei ban pyndam noh mardor ia ka jingpynbna (Notification) ba dang shen, ban ithuh ia ka Majai kum ka Raid.

Ha ka kyrwoh ba pyllait ha ka sngi Palei, u General Secretary-cum-Publicity Secretary ka HNLC Bah Sainkupar Nongtraw ula ong “Ka Sorkar NPP, kynthup ha KHADC bad ha Jylla, kala pynlong ia ki paidbah ka Sohra ban mad ia ka jingeh naka jingiap thngan bad kala pynkylla pyrdep ia ka jingim jong ki. Ha ka jaka ban kyntiew kyrdan ia ka Sohra sha ka District, kala khang pynban ia ka MCCL bad pyrshang ban pynkylla khlem kam ia ki briew jong ngi bad ki nongshongshnong ba khlem don jingmut”.

“Ka HNLC ka maham ia u CEM ba u dei ban pyndam noh mardor ia ka jingpynbna ba dang shen ban ithuh ia ka Majai kum ka Raid lem kumta…. Ka Majai ka dei kaba pyniaid da ki hehspah jong ki bar jylla ba ‘Ingkhong shyllangmat” ula ong bad bynrap ba ka jingpynbna kum ka Raid kala pynkmen shikatdei eh ia ki bar jylla ba sah ha Majai, kiba la lehkmen ia kane ka jingpynbna da kaba thang bom pataka bad iashad ia risa.

Ula bynrap “Ki paid ka bri Hynniewtrep kila ngiah kdang ia ki jingshukor ki riewsain pyrthei bad ki kam thok ka Sorkar. Ki samla ki kwah ban kyrshan hi dalade ialade bad ban weng iala ki jong ki jingeh hynrei ka Sorkar ba ialam ka NPP kala knieh noh ia ki kam jong ngi bad ki kam barit baria, da kaba iarap pynban ban pynkupbor ia ki bar jylla ha ka ioh ka kot”.

“Ka jingkhang ia ka karkhana dewbilat bad ka jingkhein beain ia ki kam khaii shyiap bad par maw kala ktah ia ka lad kamai kajih. Wat hapdeng ka jingpyrshan ka Hima bad u Syiem ban iarap da kaba shah ba kin khaii ia u mawshun sha Bangladesh, ka KHADC ka kwah ban iuhroit ia kine ki sienjam ban kyrshan ia ki nongkhaii bar jylla” ong u Bah Sainkupar.