Shillong Naitung 24: Ka Hynniewtrep National Liberation Council (HNLC) ha ka sngi Nyngkong, kala maham da kaba tyngeh pyrshah ia ki briew kiba pyndonkam bakla iaka kyrteng jong ka seng na ka bynta ban dawa pisa.
Ka HNLC kala pynpaw shai ba kam donkti eiei ha kino kino ki kam be-aiñ kum ka dak jong ka jingburom iaka sorkar pdeng bad sorkar jylla bad kala pyntip ba kala bthah iala ka tnad syntiat ban wad ia ki briew kiba donkti ha kaban dawa pisa ha ka kyrteng ka seng.
Kane ka jingmaham ka HNLC kala mih hadien ba kala don ka jingmih ha ki kot khubor ba bun ngut ki briew kila iohpdiang iaka shithi dawa pisa naka seng HNLC ha kylleng ka rilum Khasi bad Jaintia.
Ia kitei ki shithi dawa pisa la ai da ki ar ngut kiba la kam ialade kum ki dkhot ka seng, kata ha ka kyrteng u M Rynjah, uba la kam ialade kum u Finance Secretary ne da u Synshar Khymdeit kum u Area Collector jongka East Khasi Hills & Ri Bhoi.
Ia kitei ki shithi dawa pisa la iohpdiang da ki Khasi bad ki bar Jylla kiba dei ki nongkhaii bad la dawa ha ka kyrteng jong ka jingsiew iaka “income tax” na ka bynta u snem 2023 bad kane ka jingdawa pisa ka sdang naduh ka T.15 lak haduh T.80 lak.
Ka HNLC kala kyntait mardor ba kan donkti ha kane ka kam bad na ka liang u General Secretary uba bat ruh kum u Publicity Secretaryka HNLC u Bah Sainkupar Nongtraw ula ong, ka jingdawa pisa kadei ka kam kaba la leh da ki runar ba kitei kiba la soi kyrteng kim don jingiadei eiei ruh em bad ka HNLC.
Ula byrngem ban leh da kaba tyngeh pyrshah ia kito kiba pyndonkam bakla iaka kyrteng jong ka seng bad ong, “Kane ka long ka kam kaba sngewkhia bad ka HNLC kala maham ia kino kino kiba pyndonkam bakla iaka kyrteng jongka naka bynta ka kam dawa pisa. Lada ngi lap, ka HNLC kam banse ban leh da kaba tyngeh namar ba kan pynthud iaka jinglong jingman ha kaba iadei bad ka jingiakren iasuk”.
Ula ong ba kum kine ki jait jingjia kidei kiba la jia teng ha ki snem kiba la leit, u Bah Nongtraw ula ong, ba u suba jur ba kadei ka buit ban pynpulom iaka jingiaid shakhmat jong ka jingiakren iasuk.
“Katba ka jingiakren iasuk ka dang iaid shakhmat, ka lah ban dei ruh ka jingthmu kaba sha lyndet ban pynsuki ia ki kam ki jam baroh da ki briew kiba kwah ban myntoi shimet” ula ong.
U Bah Nongtraw ula ong ba haduh mynta kam pat shim la don kano kano ka jingiasoi iaka soskular hapdeng ka Sorkar Pdeng, Sorkar Jylla bad ka HNLC bad kam shym la don ruh kano kano ka jingthmu na kano kano ka liang ban pyntroin ia kane ka jingiakren iasuk.
“Ka HNLC kala kiar ia bun kiei kiei bad ban ym leh ia kino kino ki kam be-aiñ, kum ka dak jong ka jingburom iaka Sorkar India bad ia ka Sorkar Meghalaya.
Ka HNLC kala dawa ruh na ki pulit ba kidei ban kem ia kitei ki briew kiba donkti ha kitei ki kam be-aiñ.
“Ki bor sorkar kidei ban shimkhia mardor ia kane ka mat na ki tyllong jong ki shithi kiba la don ia ka Letterhead kaba shu thok ban dawa pisa bad ban kem ia kitei ki runar ban pynthikna ba kan don ka jingiakren kaba iaid beit iaid ryntih bad ba kan iaid shakhmat bad ka HNLC kala bthah iala ka tnadsyntiat ba kan wad ia ki briew kiba la tip kyrteng kum u Shynshar Khymdeit bad Samuel Wahlang,” ong u Bah Nongtraw bad ka bynrap ba katba ka jingiakren iasuk kam pat poi sha kaba kut, ki paidbah ki lah ban noh synniang sha ka seng ha ka dur jong ka jingnoh sngewbha ne Donation.
