Shillong, Jymmang 01: Ka seng Hynniewtrep Integrated Territorial Organization (HITO) hynne ka sngi Nyngkong, ka la maham ia ka seng A’chik Conscious Holistically Integrated Krima (ACHIK) ba kam dei ban ialam bakla iaki paidbah halor ka rukom treikam jong ka Roster System.
Haba kren sha ki lad pathai khubor u President ka HITO bah Donbok Dkhar ula ong ba ka jingphah shithi ka ACHIK sha ka tnad Urban Affairs ban pynsahngeh thungkam ia ki paid ki bym dei na ka Jaidbynriew Garo ka paw shai ba kane ka seng ka pyrshang ban ai ding bad ialam bakla ia ki paidbah.
U bah Donbok ula iathuh ba ka jingkam jong ka ACHIK ba 13 tylli ki kam kan dei jong u Garo beit ka long kaba bakla bad ka bym lah long, namar ba ki kam ba lait ki long tang 2 tylli.
“Katkum ka shithi ba la thoh da ka ACHIK, ka long kaba bakla bad kaba ialam bakla ia ki paidbah bad ka lah ban wanrah ka jingiasngewpher jaitbynriew hapdeng ki Khasi-Jaintia bad Garo” la ong u bah Donbok.
U bah Donbok u la ong ba katkum ka jingwad jingtip ka seng, la lap ba ka kam ba sah thylli naduh u 2019 kadei 16 tylli kaba la dep thung 10 ia u Khasi Jaintia bad 4 tylli ia u Garo bad 2 tylli ka dei na bynta u Garo hi namar ba kidei ki kam ba sah thylli namar ba don kiba la shongthait.
Ka HITO ka la ong ba ka ACHIK ha shwa ba kan kren kadei ban da wad jingtip katkum ka ain ym ban shu ai ding bad kala kyntu ruh ia ka sorkar jylla ba kadei ba peitngor ia kine ki kynhun namar ba ki ialam bakla ia ki jaidbynriew.
