Shillong, Risaw 31 : Ka Hima Khyrim kala maham jur ia ki You Tube Channels shimet (youtubers) bad ki nongshna Documentary ne ki nongpynsaphriang khubor ha ki Social Media, ba kim bit ban pynmih ia kano kano ka video ne khubor jong ka Shad Nongkrem khlem da ioh jingbit na ka Dorbar jong ka Hima.
Kane ka jingmaham kala mih namar ki jingjia ha ki snem bala leit noh ha kaba la pynsaphriang ia ki jingtip ki bym iahap halor ka Shad Nongkrem, kaba lam pynban sha ka jingialam bakla ne pynsngewthuh bakla ia kito ki briew ki bym da tip ia ka jinglong kongsan jong kane ka jinglehniam.
Ka Shad Nongkrem ba ju tip ruh kum ka Pomblang Nongkrem, ka dei kawei na ki jinglehniam tynrai jong ka Jaidbynriew Khasi ha Jylla. Kane ka jinglehniam ka neh haduh san sngi bad ju pynlong ia ka ha u bnai Naiwieng ha Smit, ka Nongbah jong ka Hima Khyrim.
Ka Pomblang ka dei ka jinglehniam ban ainguh ia ka Lei Synshar, kum ka jinglehkmen halor ka jingseisoh ka rep ka riang bad ka jingkiew shaphrang jong ki khun ki hajar.
Ka Hima Khyrim kala pynkhreh pynkhrum bha ban pynthikna ba kane ka jinglehniam Pomblang lane Shad Nongkrem 2023, kaban long ha ka 1 tarik bad 2 tarik Naiwieng kan long kaba jop.
U Myntri ka Hima Valentine Sohtun ula ban jur ia ka jinglong kyrpang kane ka jinglehniam kaba la iaid da ki pateng la pateng. Ula kyntu ia ki You Tube Channel shimet bad ki nongleh Social Media ba ki dei ban da pan jingbit n aka Dorbar hashuwa ban pynsaphriang ia ki khubor, video bad documentary jong ka Shad Nongkrem khnang ba kin lah pynsaphriang ia ka khubor kaba long thik kumba ka long, la ka dei hapoh ka Jylla ne shabar ka Jylla ruh kumjuh.
Kane ka sienjam, kat kum ka jingong u Myntri Sohtun, kam dei satia kaba jied briew iano iano ruh, hynrei ula ong ba baroh ki lah ban wan iashimbynta ha kane ka jinglehniam bad ring video ia kane ka kolshor ka Jaidbynriew. Hynrei ia kito kiba shna documentary ne pyllait khubor, ki de ban iasyllok shuwa ba ka Dorbar la ka dei bad u Syiem Khynnah ne u Syiem Rangbah ka Hima Khyrim. Kane ka dei tang ka sienjam ban khanglad ia ka jingbatai bakla ia ka jingmut ba shisha jong kane ka jinglehniam.
