Boko, Lber 14: Ka All Rabha Students’ Union (ARSU) ka la maham ba ka BJP ka lah ban ngat ha ki jingeh halor ki kam sain hima sima bad ka ban ktah ruh ia ki jingtreikam sain hima ki jong ka ha ki jaka ba bun ki nongshong shnong kiba dei ki Rabha lada ym lah ban pynurlong ia ki jingdawa ki jong ka hashwa ka ilekshon Lok Sabha 2024.
Ka ARSU ha ryngkat kiwei pat ki kynhun seng jong ki Rabha ki la pynlong ka jingiakhih kaba ar kynta hakhmat ki Circle office ha Boko hapoh Kamrup district kumjuh ha Dudhnai kaba hap hapoh Goalpara district hynnin ka sngi Nyngkong ban dawa kynthup ia ka Rabha Hasong Autonomous Council (RHAC) hapoh ka Sixth Schedule jong ka Indian Constitution bad ka Rabha Development Council na ka bynta ki trai shnong kiba dei ki Rabha kiba shong ba sah shabar ki jaka jong ka RHAC.
Wat hadien ka jingiakhih, hynrei na ka liang ka sorkar ba la ialam da ka BJP kam shym la shim ia kino kino ki sienjam ban pynurlong ia kine ki jingdawa, kaba la pynlong ruh ia u General Secretary ka ARSU u Pradip Rabha ba un maham ba kane ka pynbor ia ki ba kin pynsangeh ia ki jingtreikam sain hima jong ka party BJP ha ki jaka ba bun ki nongshong shnong kiba dei ki Rabha.U Rabha u la kynnoh ba ka sorkar ba la ialam da ka BJP ka la kular ban kynthup ia ka RHAC hapoh ka Sixth Schedule jong ka Indian Constitution hynrei kam shym la pynurlong ia kane ka jingkular wat hadien jan kumba shiphew snem kynthih.
Na ka liang u President jong ka Sixth Schedule Demand Committee, u Dasarath Rabha u la pynshai ba kane ka jingdawa ka jong ki kalong ban kynthup ia ka Rabha Hasong Autonomous Council hapoh ka Sixth Schedule jong ka Indian Constitution khnang ban kyntiew ia ka roi ka par jong ki trai shnong ki jong ki kiba dei na ka jaidbynriew Rabha.Ka BJP ka la kular ban pynurlong ia kane ka jingdawa ha u snem 2016, bad na ka liang ki nongshong shnong kiba dei ki Rabha ruh ki la kyrshan ia ki bad thaw ia ka kynhun synrop bad sorkar ba la ialam da ka BJP ha ka jylla.Hynrei, kim shym la pynurlong satia ia kane ka jingkular bad kaba lam sha ka jingpynlong ia ki jingiakhih.
U president ka ARSU u Nripen Khanda bad u Pradip Rabha kila aiti ruh ia ka memorandum sha u Circle Officer ka Dudhnai bad Circle Officer ka Boko na ka bynta ban kyntu ia ka sorkar jylla ba kan pynurlong ia kane ka jingdawa ka jong ki.
Ban bteng ia kane ka jingdawa, na ka liang ka ARSU ka don ruh ia ka jingthmu ban pynllong da ka rally rah dongmusa lyngba ki regional committee ki jong ki kiba hap hapoh ki jaka jong ka RHAC ha ka 17 tarik mynta u bnai, bad hadien yn bud sa ki jingiakhih da kaba iaid kjat na Boko sha Dhupdhara ha ka jingjngai kaba kumba 18 kilomitar bad na Dudhnai sha Dhupdhara ha ka jingjngai kaba kumba 20 kilomitar ha ka 29 tarik mynta u bnai.Ha kaba khatduh yn pynlong da ki artylli ki jingialang iakhih paidbah ha Dudhnai bad Boko ha ka 3 bad 12 tarik u Iaiong 2023.
