Shillong, Rymphang 03 : Ka seng Federation of Khasi Jaintia & Garo People (FKJGP) hynne ka sngi thohdieng, kala maham ban leh da kaba tyngeh kata ban shu beh seng beit ia ki Nongialam ne ki Dkhot ka seng lada ki donbynta ha ki kam ialap elekshon ban jied ia ki Nongmihkhmat sha ka Iingdorbar Thaw Ain ka Jylla, ka ban long ha ka 27 tarrik Rymphang.
“Ka FKJGP ka khang pyrshah ia ki Nongialam naduh ki dkhot ka Central Executive Committee (CEC) haduh ki Dkhot ha ki Circle bad ki Unit ba kim bit ban mih ha ki rynsan ialap elekshon ne ban iaid ialap elekshon ia ki kyrtong ba iakhun ia ka elekshon MLA-2023 ha Jylla” ong u Bah Eldie N Lyngdoh, General Secretary ka FKJGP.
Kat kum ka jingong jong u, ka FKJGP kam kyrshan iano iano ruh ha kane ka elekshon bad ka dei kaba ieng hala ki jong ki nongrim”.
“Ka Elekshon ka dei ka elekshon jong u briew shimet bad kam don bynta eiei ruh em bad ka FKJGP. Ngim ym shah da lei lei ruh ban pynjaboh ia ka Seng” ula ong.
U Bah Eldie ula ong “Lada ki Nongialam ka CEC ne ki Dkhot ki kwah ban iashimbynta ha kane ka elekshon, kin hap ban leh shimet bad shuwa ba kin leh ia kane, kin hap ban iehnohkam shuwa na ka seng bad da pyntip”.
“Lada ki leit iashimbynta khlem da pyntip bad lada lap lem bad ki sakhi, ka seng haba kut, kan shu beh seng beit beit ia ki. Ngim kwah ba ka FKJGP kan shah pynjaboh” ula ong.
