Shillong, Naitung 30 : Ka Meghalaya, kaba la ioh ia ka nam kum ka jaka ba ioh bun eh u slap khamtam ha ka lyiur, mynta kala mad ia ka jinghiar bun bun shah ha ka jingiohslap hapoh ka Ri mynta u snem.
Ka jingkhein bala ioh na ka Indian Meteorological Department (IMD) ka pyni ba ka Meghalaya kala ioh 698.8mm u slap hapdeng ka 1 tarik Jylliew haduh 29 tarik Naitung, haba ianujor bad ka jingioh slap barabor kaba kot 1,584.6 mm, kaba pyni ia ka jingduna haduh 56%-ka jingduna kaba heh duh hapdeng baroh ki Jylla ka Ri India.
Tang ha ka 29 tarik Naitung, ka Meghalaya kala ioh 3.5 mm u slap, na kaba ju ioh kaba kot 29.2mm, kaba pyni ia ka jingduna haduh 88%. Ka IMD kala khein ia kane ka jinglong jingman kum ka jingduna kaba heh duh (Large Deficient).
Ka West Jaintia Hills District kala duna bun eh ha ka jingioh slap kaba la kot haduh 78% ka jingduna, bud sa ka West Khasi Hills da 74% ka jingduna bad ka West Garo Hills kaba kot 68% ka jingduna ioh slap.
Ha baroh kawei ka thain Shatei Lam Mihngi, kiba bun ki Jylla kila iaksaid hynrei ym kumba mad da ka Meghalaya kaba la jur eh. Ka Assam kala duna da 41% ka jingioh slap, ka Arunachal Pradesh da 44% bad ka Tripura da 44%. Ka India baroh kawei kala ioh tam ia u slap kaba kot haduh 7% ka jingtam ha kane ka aiom lyour, kaba pyni ia ka jingkylla ka suinbneng ha kane ka thain Shatei Lam Mihngi ka Ri.
Ka Jylla Meghalaya ka don ia u pud ba 443 km bad ka Ri Bangladesh sha ka thain Shathie bad kala shah ker pat ha ka Assam ha baroh kiwei ki liang. Namar ba ka dei kaba bun ki jaka nongkyndong bad ba shaniah shibun ha ka jinglong ka suinbneng ha kiba bun ki kam kum ha ka rep ka riang, ka jingioh um bad ki jingmih ki khlaw ki btap, ka Meghalaya ka lah ban shah ktah jur ha ka jingkylla ka suinbneng.
Ka jingioh duna slap kala ktah ia ka jingpynmih ia ki marrep ba mih ha ka por lyiur bad pyrem khamtam u khaw, uba shaniah tylli ha ka umslap. Ka jinglang ka um sha meiramew ruh kala duna bha, kaba buh ha ka jingma ia ka jingioh umbam umdih ha ki jaka nongkyndong bad ruh kaba ktah ia ka jingpynmih bording elektrik.
Ka jingwad bniah ka pyni ba kan nang bun ka jingbym thikna ia ka jingioh slap, da ka jingbym nang batai shuh ia ka aiom. Katto katne ki jaka kila ioh klai bha ia u slap katba ki don pat kiba tyrkhong raw raw, kaba ktah ia ka jingpynmih ia ki marrep.
Ka khubor kaba bha ka long ba ka don ka jingbatai lypa ba bun ki jaka kin sa ioh ia u slap ha ki sngi ban wan bad don ruh ki ban ioh ia u slap uba wan ha ryngkat u pyrthat bad ka leilieh.
Kat kum ka Agromet bulletin bala pynmih da ka IMD Shillong ha ryngkat ka jingiatreilang bad ka ICAR Barapani, la iathuh ba ka lah ban don ka jingioh slap ba 170 mm ha kine ki san sngi ban wan. La bthah ia ki nongrep ba kin shna bha ia ki nur ha ki jaka rep khnang ban khanglad ia ka jinglang ka um.
La bthah ruh ba kin kiar ha kaban leit trei lyngkha ha ka por jur bha, pom leilieh bad jur lyer. La kyntu ba kim dei ban rah lane pyndonkam ia ki tiar ba kynja nar ha ka por ba pom pyrthat.
