Shillong ,Naitung 18: Watla ka don ka jingkiew kaba jur bha ha ka jingwan ki nongjngohkai pyrthei sha Meghalaya kaba la kot 18 lak ngut haduh mynta, hynrei ka jylla ka ïakynduh ïa ka jingeh kaba khraw ban pynhun ia ka jingdawa ban pynbiang ïa ki kali.
Ia kane la pynpaw da u Myntri kam jngohkai ka Jylla Bah Paul Lyngdoh hynne ka sngi Thohdieng hadien ba u la lum ia ka jingialang bad ki heh Ophisar, kaba iakren kumno ban pynim ia ka kamai ki nongniah kali Tourist Taxi hadien ka jingdawa jong ka All Khasi Meghalaya Tourists Taxi Association (AKMTTA) ban khang noh ia ki kali kiba wan na shabar ka jylla ban leit kamai sha ki jaka jngohkai pyrthei bapher kiba don ha ka jylla.
U bah Paul ula ong ba shen un sa khot ia ka jingialang bad ki kynhun bapher bapher kiba trei ia ki kam jngohkai pyrthei ba kynthup ia ki nongniah kali tourist, ki Tour Operator bad kiwei kiwei ki ba don bynta, ban iakren bad pynbeit ia ki jingeh bapher bapher haba kren shai pat ba kam don kano kano ka jingkylli kaba mih ba ka Sorkar kan khang ia ki kali kiba wan na shabar ka jylla.
La bthah ïa ka tnad Transport ba kan pynbiang ïa ki jingtip halor ka jingdon jong ki kali kiba don ïa ka Registration jong ka Meghalaya shwa ban pynlong ïa ka jingïalang, kaba la tyrwa ban pynlong hapoh kine ki 10-12 sngi ban wan.
Haba iakren bad ki nongthoh khubor, u bah Paul u la ong ba kumba long mynta, ka jingwan jong ki nongwan jngohkai pyrthei ha kane ka jylla Meghalaya kan jin da la palat ia ka 18 lak ngut. Hynrei ka don ka jingïapher hapdeng ka jingdawa bad ka jingpynbiang ïa ki kali ban kit ïa ki nong jngohkai sha ki jaka jngohkai pyrthei kiba ki sngewtynnad.
“Ka jingdawa kali ka nang kiew bha katba ka jingpynbiang ia ki kali pat kala duna…kumta ngi la pyrshang ban pynbiang ia kane lyngba ki kali PRIME Tourism ban pynbiang ïa ka jingdawa ki nongshangkai,” u la ong.
Haba pynpaw ba kam don kano kano ka jingkylli ban khang ïa ki kali na Assam bad na kiwei kiwei ki jylla, u Myntri u la ong, “Phi hap ban buh ha ka jingmut ba kine ki kali Tourist ki don ïa kaei kaba la tip kum ka National Permit la ka long ka National Permit ne ka Permit ba lah ban iaid ym duna ïa ka lai tylli ki jylla. Ki don ki ain hynrei kaei kaba nga ong, ka long ba, ban ia kaba pynleit jingmut tang ha ki jingeh kiba la pynpaw, ngi hap ruh ban peit ia ki lad ki lynti. Kum ka nuksa, kane ka dei ka ïoh ka kot kaba la pynlong da ka jingdawa bad phim lah ban khang lut ïa ki jingkhang haba ki nongpynïaid jong ngi hi kim lah ban pynbiang ïa ka jingdawa jaka sah bad kumjuh ruh ïa ka jingkit jingbah sha ki jaka jngohkai pyrthei bapher bapher.”
“Kumba nga la kdew, ka jingbun ki briew kiba wan kai sha Jylla ka la nang kiew katba ka jingdon ki kali ka la kham bun ne kala sahkut kumjuh. Ngin sa hap ban pynbeit ïa kane na ka tnad jngohkai pyrthei, ngi dang shu pynrung ïa ki kali PRIME bad thikna ba ngi hap ban pynbun ïa ki kali,” ula ong.
Ula ban jur ruh ba ka sorkar jylla ka hap ban pynthikna ba “kino kino ki lad ki lynti kiba ngi shim kim dei ban don ka jingktah namar ym dei tang ki nongjngohkai pyrthei na Assam, kiba leit sha Shillong bad kiwei kiwei ki jaka jngohkai pyrthei hynrei ki briew na Meghalaya ruh ki leit sha ki bynta jong ka Assam, ki leit jngoh ia ki Park jong ki, kumta kano kano ka rukom treikam kaba ngi shim ka dei kaba hap ban leh ha kata ka rukom ka ban ym ktah ia ka kam jngohkai pyrthei ha Meghalaya.”
Da kaba buh jingmut ïa kane, u bah Paul u la pyntip ba ula bthah ïa ka tnad Transport ban pynbiang ïa ka jingtip halor ka jingdon jong ki kali kiba kit ïa ki nongwan jngohkai ha kane ka jylla shwa ban pynlong ïa ka jingïalang bad baroh kiba don bynta.
Ula ong ba mynta ngi im ha ka juk digital ha kaba ym donkam ban leit hi dalade ban shim ia ka kali hynrei kila don ki kynhun ha Delhi kiba ai ïa kum kane ka jait jingshakri ban pynïasoh beit ïa ki nongwan jngohkai na Guwahati bad nangta sha Meghalaya.
