Shillong, Rymphang 25 : U Nongialam ka UDP bad Myntri Sorkar Bah Kyrmen Shylla ula ong ba ki paidbah ka Ri-lum Jaintia ki dei ban ioh ka lad ba laitluid ban shimrai halor ka jingwan ka lynti rel khlem ka jingtuklar jong kiba nabar.
“Nga kwah ban iohi ba kam dei ban don ka jingwan tuklar nangno nangno ruh. Ai ba ki paidbah ka Ri-lum Jaintia kin rai halor ka lynti rel” ong u Bah Kyrmen haba iakren bad ki nongthoh khubor haba jubab ia ka jingkylli halor ka jingtyrwa ba thymmai ban pyniasoh lynti rel ba 180 Km na Chaparmukh Junction, Assam sha Jowai, Meghalaya.
Watla ka jingiasyllok ka dang iaid shakhmat, une u MLA ka Khliehriat ula ong ba ka long kaba donkam ban pynlong ia ki jingialang kiba heh ha kaba baroh khamtam ki trai shnong na kitei ki jaka ki lah ban iashimbynta bad shim ia ka rai halor kane ka jingtyrwa.
“Lada jia ba ki kwah ban wanrah lynti rel sha Jowai, ai ba ki paidbah ka Jowai kin rai bad lad aka iaid lyngba ka thain jong nga, ai ba ki briew jong nga kin rai la kin pdiang ne em. Ym dei ban don ka jingwan tuklar jong kiba nabar. Kane ka dei kaba nga kwah ban ong” ong u Bah Kyrmen.
Haba kylli la ka don kano kano ka jingtuklar na kino kino ki liang, u Myntri ula ong “Ngam lah ban ong la ka don ne em namar kam shym la poi sha ka jingtip jong nga, hynrei nga shu ong ba lada don eiei, kim dei ban tuklar hynrei ailad ia ki trai shnong ba kin rai namar ki tip kham bha ia ka kamai jakpoh bad kumno ki long. Ngi dei kiei ban leit tare na ka pliang ja kiwei?. Ka biang ban kyrshan bad khlem pep ngin kmen eh ban ioh ia ka jingkyrshan jong ki kiwei namar ngi hap ban shimkhia iala ki briew lajong”.
Nalor kane, u Bah Kyrmen ula ong ba u la rai kut ban ieng ryngkat bad ki paidbah lajong bad ka rai jong ki halor ka lynti rel.
“Kum u nongmihkhmat ka thain, ngi hap ban kren iala ki jong ki briew. Lada ki on gem, ka mut ba ngin ia ieng lang pyr shah ia ka Sorkar lada ki pyrshang ban wanrah ia ka lynti rel. Hynrei lada ki paidbah ki ong hooid, ngin ieng ryngkat bad ki paidbah bad sa kyrpad ia ka. Nga don ryngkat bad u paidbah la ka dei hooid ne em, ngan don ryngkat bad ki” ula ban jur.
