Gangtok, Jylliew 11: Ka Jylla Sikkim ka la mad ia ka jingshah pynjulor kaba jur bha haka bor mariang lyngba ka jingshlei um bad jingtwa khyndew kaba la pyndkut iaki surok kiba pyniasoh ia kiba bun ki shnong.
La iathuh baka surok bah National Highway ha Singtam kala shah pakhang ha Shantinagar namar ka jingther u lapbah kaba la wanrah ka jinghap ki maw, shyiap bad khyndew.
Ka jingther u lapbah kala wanrah ka jingshah pynjulor 8 tylli ki iing hapoh ka shnong Majuwa kaba don hapoh ka thain Yangang jong ka South Sikkim.
Ka jingther u lapbah kala ktah bha iaka Sisnay bad Namphok hapoh ka South District bad kala don ka jingtwa khyndew ba jur bha hapoh ka shnong Majhuwa jong ka Yangang Sub-Division, South District bad kane kala wanrah ia ka jingduhnong kaba khraw iaki nongrep.
Ka Indian Meteorological Department (IMD) kala pyntip baka don ha jinghap slap ba 101.6 mm hapoh 24 kynta kaba la wanrah ka jingshah pakhang lynti ha bun bynta ka Jylla.
