Guwahati, Lber 31 : U lapbah bad ka eriong kila lynshop ha kiba bunki jaka jong ki jylla ka thain Shatei Lam Mihngi ka Ri ha ka janmiet sngi U Blei, kaba wanrah ruh ia ka jingshlei um hapoh ka Guwahati Airport haduh ba hynriew tylli ki lieng suin kila hap ban leit hiar sha kiwei pat ki kad.
Ka tnum jong ka Lokapriya Gopinath Bordoloi International Airport (LGBIA) Terminal, kala shlei um bad bun ki machine kim shym la treikam shuh.
Bun tylli ki jaka ha nongbah Guwahati ba kynthup ia ka Jalukbari, Dharapur, Azara, VIP bad kiwei kiwei ki jaka kila shah syllad ha ka eriong bad u lapbah. Ka lyer kala jynrat wat ia ki dieng bah shabar jong ka phylla ka Oil India kaba don jabar ka Airport, kaba la khang syndon ia ka lynti ban leit sha Airport.
Ha ka sngi U Blei, haduh hynriew tylli ki liengsuin jong ka Indigo, Air India bad India Express kila hap ban leit hiar sha Agartala bad Kolkata namar ka jingjur palat ka eriong.
Ka Tnad IMD kala pyntip ba kane ka jingther u lapbah kan iai neh haduh ka 4 tarik u Iaiong ha Assam bad ha kiwei ki Jylla ka thain Shatei Lam Mihngi.
Mynsaw 3 ngut ha Boko, Assam
Ha ka thain Boko-Lampi kaba don ha khappud ka Assam-Meghalaya, lai ngut ki briew kila mynsaw jur na ka jingtwa ka iing ha ka jingther u lapbah. Kine kiba mynsaw ki kyrteng u Bhima Roy ba na Lampi bad Radhika Chunar na Makaibari. Uwei pat ula mynsaw na ka jingkhyllem u dieng sha ka iingsah jong u ha Harshanagar-Mainadara kaba don ha Lampi.
Iap 4 ngut, mynsaw bun ngut ha Jalpaiguri, West Bengal
Haduh 4 ngut ki briew kila iap bad kumba 70 ngut kila mynsaw na ka jinglynshop ka eriong bad u slap hynnin ka janmiet sngi U Blei. Ka eriong kala pynjulor klai bha ha ka thai ba kynthyp ia ka jingjynrat ia ki iing ki sem, ki dieng bad pynkhyllem wat ia ki post elektrik.
