Ioh tam ia 3 tylli ki met na jingtwa khyndew ha Hatiasia Songma
Tura, Risaw 06 : Ka jingiap briew ha Ri-lum Garo na ka jingther u slap-uba wanrah ia ka jingshlei um ba shyrkhei bad jingtwa khyndew, kala nang kiew sha ka 15 ngut da ka jingiap biang sa 5 ngut ki briew ha ka sngi U Blei.
Kine ki 5 ngut ki kynthup ia u Kpa bad u Khun, kiba la shah rong ha ka umsaw katba ki dang pyrshang ban jam ia ka surok ba shlei um da ka kali ha Dimapara. Arngut pat ki dei ka Kmie bad ka Khun kiba la kylla lanot ha ka jingtwa khyndew katba ki dang iap iohthiah hala iing ha ka miet sngi Saitjain bad step sngi U Blei lem bad uwei u briew uba iap na ka jinghap u dieng ha ka kali ba u shong ha ka miet sngi Saitjain.
Kane ka jingshah rong um ki Shikpa shikhun kala jia ha ka janmiet sngi Thohdieng bad la tip kyrteng ia ki da u Bijoy S Sangma ba 44 snem, uba dei u Nonghikai bad u khun ba 13 snem ba kyrteng u Wan Chigado R Marak. Kine ki arngut ki dang wan phai na skul ha ka janmiet sngi Thohdieng bad iakynduh ia ka jingshlei um harum jongka jingkieng Dimpara namar ka jingpoi umsaw ka wah Bugai.
Kat kum ka jingiathuh ki trai shnong, kila don ki briew kiba la khang ia kine ki arngut ban jam ia ka surok ba shlei um namar ka um kala khlain bha hynrei une u nonghikai ula niom beit naphang khlem ka jingsheptieng da ka kali Wagon R ba don u nombor WB06-7718. Ka umsaw kala rong ia kane ka kali katto katne meter na kane ka jaka.
Katba ia ka kali la ioh tam da ka SDRF ha ka sngi Saitjain, ia ki met jong kine ki shikpa shi khun la ioh ban tam ha ka step sngi U Blei n aka jaka them jong ka shnong Sonagre, ha Dalu. Kine ki arngut ki dei kiba sah ha Rongkhon Songgital, Tura.
Ka jingiap briew ha East Garo Hills
Ha kawei ka jingjia, ka Kmie bad ka Khun kila iap na ka jingtwa khyndew ha ka miet sngi Saitjain bad step Sngi U Blei katba ki dang iap iohthiah hala iing ha ka shnong Gongdop kaba hap hapoh ka Rongjeng Police Station, East Garo Hills. Kine ki arngut ki kyrteng ka Amerin K Marak bad ka Khun ka Manase K Marak. La ong ba ka khyndew kala taplup lut ia baroh kawei ka Iing ha kane ka jingtwa khyndew.
Ia ka met jong kine ki shikmie shikhun la ioh ban sei noh da ki SDRF bad ki trai shnong ha ka step sngi U Blei.
Ha ka jingjia kaba lai, uwei u briew ba kyrteng u Thenseng R Marak ula iap ha ka miet sngi Saitjain haba u dieng uba la shah jynrat ha ka eriong, ula leit hap hapoh ka kali ba u niah ha ka thain Songsak Reserve Forest, East Garo Hills. Kane ka kali ka dei ka Renault Kiger kaba don u nombor ML08-J-1279.
Kane ka jingjia kala jia ha ka National Highway 127B ba marjan ka shnong Rongre. La iathuh ba u Thenseng ula don lang bad arngut ki bahaing kynthei ha kane ka kali kaba dang mih na Dalu ban leit sha Rongjeng.
U Thenseng uba dei na Thibapara, ula iap hashen ha kane ka jingjia katba ki arngut ki kynthei, ka Sengrikchi D Sangma ba 29 snem bad ka Clarinda D Sangma ba 27 snem, kiba dei shipara, kila mynsaw jur. Ia kine ki shipara la pynkit noh sha Songsak PHC hashuwa ban pynkynriah sha Williamnagar Hospital.
Ioh tam 3 tylli ki metiap na ka jingtwa khyndew ha Hatiasia Songma
Hadien arsngi ka jingtrei khlem shongthait, ka kynhun SDRF bad NDRF hynne ka janmiet sngi U Blei, kila ioh ban sei ia 3 tylli ki metiap napdeng ki 7 ngut ki shiing shisem kiba shah tep im ha ka jingtwa khyndew ha ka shnong Hatiasia Songma ha South Garo Hills. Ia kine ki metiap la ioh ban sei ha ka por 1:30 nohphaisngi.
