Shillong, Iaiong 05 :Ka Tnad Animal Husbandry & Veterinary ka Jylla kala pyntip ba ka khlam sniang ba la tip ha ka ktien nongwei kum ka African Swine Flu, kala lynshop mynta ha Jylla bad pynbna ia ka shnong Dalu bad ka Asiragre kiba hap hapoh ka Dalu Block, West Garo Hills kum ka thymmei ba sdang kane ka jingpang (Epicentre).
Kane ka jingpyntip kala mih hadien ba ka Tnad kala ioh ia ka kaiphod jingtohkit na ka North Eastern Regional Diagnostic Laboratory (NERDDL), Guwahati ba pynthikna ia ka jinglynshop jong ka jingpang African Swine Flu hadien ka jingleh test ia ki snam sniang. Ia kane ka kaiphod la ioh pdiang ha ka 30 tarik Lber, 2023.
U Dr. Manjunatha, C, IFS, Secretary ka Tnad Animal Husbandry & Veterinary u pyntip ba ia kane ka kaiphod la ioh pdiang ha ka 30 tarik Lber, 2023 bad kum shibyta ban iada, tehlakam bad ban rat dyngkhong ia kane ka jingpang, u Lat ka Jylla ula pynbna ia ka Shnong Dalu bad Asiragre kum ki thymmei bas dang kane ka khlam.
U Lat ula pynbna ia kane kat kum ka kyndon 6 bad kyndon 20 jong ka Prevention and Control of Infectious and Contagious Diseases in Animals Act, 2009.
Une u Heh Ophiar u pyntip ba ka Sorkar kala pyntreikam ia ki jingpyrrkhing ba mardor ha kine ki shnong bad pynbna ruh ia ki shnong ba hapoh ka 1 Km radius na kine ki thymmei kum ki ‘Infected Zone” bad baroh ki shnong ba hapoh 10Km radius kum ki “Survellance Zone”.
Ka Sorkar kala pynmih ruh ia ki jingbthah ba ym shah shuh ban kit ia ki sniang, ki sboh, ki doh kynthup ruh ki tiar ki tar na ki sem sniang bad kumjuh ruh ki dawai ba sumar ia kine ki sniang na kine ki shnong bala ithuh kum ki Infected Zone sha ki Survellance Zone bad ki shnong ba pat don jingpang.
La khang ruh ban kit ia ki sniang, ki sboh, ki doh, ki jingbam bad kiwei kiwei na ki Survellance Zone sha ki Disease-Free Zone. Ka jingkit ia ki sniang tang hapoh ka Survellance Zone la shah lait noh ban kit sha ki Infected Zone.
Nalor kane, la khang ruh ban rah ia ki doh sniang na ki Surveillance Zone sha ki Disease-Free Zone haba bthah ba ia ki sniang kiba iap,dep ban da tep bha nalor ka jingber shun rben ym ban shu bret sha ki nala, ki wahduid, ki wahheh.
Ka Sorkar kala khang ruh ia ki briew ban rung ban mih sha ki shnong ba hap hapoh ka Infected Zone katba ia ki kali ba mih na ki Infected Zone la shah ban mih tang hadien bala pynkhuid bha bad ba suit dawai.
Pule lang ia kane: Rai ka Harijan Panchayat ban iakynduh ia ka Sorkar ba thmu pynkynriah ia ki Longiing na Them Metor
