Tura, Iaiong 28: U lapbah ba jur ha ryngkat bad ka lyer kila lyngshop ia ka sor Tura bad kumjuh ruh ia ki jaka ba marjan ha kaba u wei u dieng u la shah jynrat bad khyllem bad la pynjurlor pat ia ar tylli ki kali ha Upper Babupara, kaba don mar pyrshah bad ka Cenotaph site.
La iathuh ba u lap bah ba jur u la sdang kumba ha ka por shi baje mynstep bad u iai bteng haduh ka por 6 baje mynstep.
Halor ka jinglong jingman jong ka mariang kaba la jia ha kane ka sngi, ka tnat Indian Meteorological Department (IMD) Meghalaya ka la pynmih ia ka jingmaham ban ther u lapbah ha kylleng ki district jong ka jylla.
Ka IMD, ka iathuh ba kan don ka jinghap slap ha baroh ka Jylla Meghalaya, ha ki saw ne san sngi ban wan, ha ryngkat u pyrthat, bad ka lei lieh kumjuh ruh ka lyer kaba jur.
Ka tnad ka la maham ruh ia ka jingkhynñiuh jumai kaba lah ban jia ha ka 29 tarik u Iaiong, kaba lah ban ktah shuh shuh ia ka jingim kaba man ka sngi ha kylleng ka jylla.
Halor kane, ka IMD kala bthah ia ki paidbah nong shong shnong ba kin long kiba husiar namar ba kan don ka jinglyngshop ka lyer kaba jur bad kumjuh ruh u pyrthat.
Na ka liang ki bor pyniaid District kila kyntu ia ki paidbah ba kin long phikir bad husiar bha bad kumjuh ruh ban wad jingtip halor ka jinglong jingman jong ka suin bneng.
