Shillong, Nailur 09 : U Myntri ka Tnad Social Welfare Bah Paul Lyngdoh ha ka sngi Nyngkong, ula lum ia ka jingialang jong ki 10 Dorbar shnong ka West Shillong constituency bad kular ban sa shim ia ki sienjam ha kaban leh eiei pyrshah ia ka jingkynrei u droks ha ka thain.
Haba kren sha ki lad pathai khubor, u Bah Paul ula ong ba ka jingialang kala iakren ia kiba bun ki mat ba iadei bad ka jing khaii droks hapoh ka thain khamtam ha Lumsohphoh, Upper Mawprem bad Mawbah bad ruh ha kiwei ki jaka jong ka Nongbah Shillong.
“Haba phai sha ka kam khaii droks, la batai shai ba ka don ka jingduna ki briew ban tehlakam. Ka Sorkar kala pyrshang ban leh eiei halor kane da kaba thep kam hapoh ka Tnad Pulit bad ngi khmih lynti ba ngin sa don bun ki Pulit ki ban sa leit sha baroh ki jaka kiba jyllei u droks” ula bynrap.
Nalor kane, u Bah Paul u pyntip ba kila don ruh katto katne ki jingai jingmut kiba la mih ha kane ka jingialang ba kynthup ia ka jingwanrah ia ka thain hapoh ka MRSSA, 2016, ban pynrung kyrteng noh mar mar ia ki nongshongshnong jong ka thain.
Ula pyntip ba ka jingialang kala rai ban pynkha noh ia ki Village Defence Party (VDP) ha kine ki Dorbar Shnong.
“Ia mynta, ki don 17 tylli ki VDP ha kylleng ki shnong ka Nongbah Shillong hynrei nga la kyrpad na nga shimet sha ki Dorbar Shnong ba kin pyntreikam ia ka jingkyrpad jong ngi ba kin pynkha ia ki VDP hala ki jong ki shnong ki thaw” ula ong.
