Nongpoh, Nailar 03 : U MLA ka Nongpoh Constituency Bah Mayralborn Syiem, hynne ka sngi Palei, ula lum ia ka jingialang jong ki Nongialam Niam, Nongialam Shnong, kynhun Sengbhalang bad ki Longkmie Longkpa ha Nongpoh, ban iaphylliew jingmut halor ka jingkongsan ban pynneh pynsah ia ka shongsuk shongsain hapoh Ri-Bhoi District.
Ia kane ka jingialang la pynlong ha Circuit House, Nongpoh, kaba la iatai sani halor ka jingkongsan ka shongsuk shongsain khtam ban pynkreh ia ki lad ki lynti ha kaban tem ia kino kino ki jingiakynad ne ki huri hura kiba lah ban mih ha kano kano ka por na ka jingdon jong ki briew kiba thmu ban wanrah ia ki jingpynkulmar shnong ne ki jingiakynad.
Ki MLA kiba la poi sha kane ka jingialang ki dei u MLA ka Nongpoh Bah Mayralborn Syiem bad u Bah Sosthenes Sohtun nalor u MDC ka Nongpoh Bah Balajied Ranee.
Ki Nongiashimbynta ha ka jingialang, kila pynpaw ba kum kane ka jingialang ka long kaba donkam shisha ha kum kane ka por haba ong “Watla kim pat don kino kino ki dak ki shin ka jingiakynad ha them Ri-Bhoi hynrei kum ki Nongialam Shnong, Niam kiba don ka jingkitkhlieh, ngi dei ban long kiba la khreh ban tem ia kino kino ki jingjia”.
Kawei naki daw bala pynlong ïa kum katei ka jingïalang ka dei namar ba ka Ri Bhoi District kala dei kawei naki district kaba la khleh bha ki jaitbynriew kiba shong ba sah ha ka.
Kane ka jingialang ha kane ka sngi kala thaw ruh ia ka Committee jingsuk (peace committee) ka ban sa jer kyrteng ha ki sngi ban wan bad ban jied ruh ia ki nongkitkam.
