Shillong, Risaw 10: U MDC ka Laban-Mawprem constituency Bah Ricky Shullai ha ka sngi Thohdieng, ula lum ia ka jingialang bad ka Raid Laban Dorbar Pyllun, Hima Mylliem, ki ophisar ka KHADC bad kiwei kiwei ki kynhun ba don bynta ban iakren halor ka jingshna ia ka surok pyniasoh (Link Road) kaba 600 meter kaba pyniasoh bad ka Shillong Peak Viewpoint.
U Bah Ricky ula ong ba kane ka project ka dei kaba la sahkut naduh u snem 2018.
Hashuwa kane, une u MDC ula pynlong ruh ia ka jingjurip iaka jaka ba thmu ban shna surok thymmai kaba dei nakhmat ka jaka rung sha ka jaka Shipai.
“Ka jingïalang ka la long kaba seisoh bha. Ki Myntri ka Hima Mylliem ki la bishar bniah iaka jaka bad shen kin sa phah ïa ka shithi mynjur sha ka District Council bad hadien ba ngi la ïoh ïa ka jingmynjur na ka District Council, ka Raid Laban Dorbar Pyllun kan sa ioh iaka NOC khnang ban ioh iakren biang bad ka Sorkar Jylla ba kan pynurlong ia kane ka surok thymmai” ong u Bah Ricky.
U Bah Ricky u la ong ba ka thong ban shna surok thymmai kadei ban pynduna ia ki jingeh kiba bun, kiba ki nongshong shnong, ki nongjngohkai pyrthei, bad ki nongdie dukan ha katei ka thain ki iakynduh.
Ula ong ba kane ka surok thymmai kaba 600 meter kan pyniasoh bad ka Laitkor bad ka Woodland Nursing Centre, kaba ai jingmyntoi ia ki nongleit nongwan bad ban kyntiew ia ka kam jngohkai pyrthei ha kane ka thain.
U MDC ula iathuh ba ki bor shipai Air Force ki ju khanglad man ka por ïa ki paidbah ban ïaid naka surok lyngba ka jaka shipai ban poi sha Viewpoint halor ki nongrim jong ka jinghngain bad jingïada, haba ai nuksa ha ka por jong ka jingjia ha Pathankot kumba lai bnai bad sa shisien pat haduh ar snem shiteng ha ka por ba don ka khlam Covid-19.
“Hadien ba la dep kane ka surok thymmai (Link Road), kan long ka jingkyrkhu kaba khraw ïa ki briew jong ngi, kan kyntiew iaka ioh ka kot lyngba ka jingwan tuid ki nongwan shangkai pyrthei” u la bynrap.
Haba kylli, u MDC u la pynpaw ïa ka jingkyrmen halor ka jingpyntreikam ïa kane ka projek, da kaba kdew ïa ka jingpyrshang jong ka Sorkar Jylla ban kyntiew ïa ka kam jngohkai pyrthei ha kane ka thaiñ.
 kaba 600 meter kaba pyniasoh bad ka Shillong Peak Viewpoint.){kind=link}