Shillong, Nohprah 22: Ka Sorkar Jylla hynne ka sngi palei, kala kyntu ia ki nongshongshnong ka Jylla ba kin sdang iadeng mask biang kum ka sienjam ban iada ia ka jingsaphriang biang jong ka khlam Covid-19 hapoh ka Jylla.
Kane ka jingbthah kala mih hadien ba ka Sorkar Pdeng kala hukum ia baroh ki Jylla bad ki Union Territories ban buh jing khein ia ki positive case ba manla ka sngi hadien ka jingnang kiew biang ha ka jingdon kiba pang Covid-19 ha kiba bun ki ri ka pyrthei kynthup ha China.
Hadien ka jingialang bishar kam, u Myntri Rangbah Conrad K Sangma ula iathuh ha ki lad pathai khubor ba ka Sorkar Jylla kala iai bteng ban peitthuh ia ka jinglong jingman.
“Ha kane ka aion lehkmen, ka jingai jingmut kaba don ka long ba katba lahm ki paidbah ki dei ban deng ia ki mask” ula ong.
Haba pynpaw ba ka jinglong jingman ia mynta ka dang biang bad ym dei satia ban khuslai, u Conrad ula ong “Kam don satia ka jingma ia mynta hynrei kum ka Sorkar, ka dei ka kamram ba kam dei satia ban kheinsting. Namar kata, kum ka imlang sahlang bad kum ka Sorkar bad kum ki riew shimet, ngi dei ban long kiba husiar bha”.
Ula ong ba ka jingialang halor ka Covid ka dei ka jingialang kaba donkam ban pynlong haba khmih ia kaei kaba longba man bad kaba la sakhi ha kylleng ki ri ka pyrthei.
“U Myntri Rangbah Duh dalade ula lum ia ka jingialang katba ngi dan giakren bad kane ka dei tang ka jingialang ban shim ia ki sienjam ban iada namar ngi baroh ngin sa leit sha ka shuki Khristmas bad namar kata, nga sngew ba donkam ban bishar ia ka haba khmih ia ka jinglong jingman ha ka pyrthei” ula bynrap.
Kat kum ka jingong jong u, ka jingdon kiba iabit ia ka jingpang Covid ka dang duna bha ha ka Jylla bad ka long tang 0.1 lane 0.2%.
