Shillong, Jymmang 30: Namar ka Jylla Meghalaya kala shah ktah jur na ka jingwan ka eriong bad ka jingther u lapbah lapsan, u Myntri Rangbah ka jylla u Conrad K. Sangma hynne ka sngi Thohdieng, ula lum ia ka jingialang bishar kam kaba kyrkieh bad ki Deputy Commissioner ban khmih bniah ia ka jinglong jingman ka suinbneng bad ka jingshah pynjulor haba bthah ruh ia ki Tnad Sorkar ba kin iatreilang ha ka kam ban ai jingiarap ia ki lanot.
Ia kane ka jingialang kaba la lum hapoh ka jingpyniaid ka tnad Revenue and Disaster Management, kala ai ka jingbatai kaba bniah da u Commissioner and Secretary u Sanjay Goyal, uba la pynpaw ia ki jingpynkhreh ha ki district bad kumjuh ruh halor ki jingjia jong ka jingwan lynshop ka bor mariang.
Namar ka jingkhmih lynti ba ka jinglong jingman jong ka suinbneng kan dang iai bteng haduh ka 31 tarik u Jymmang, kumta u Myntri Rangbah ula bthah ia baroh ki tnad ba kin pynjur iaka jingkhmih bniah bad ruh ban shim ia ki lad ban ai jingiarap na ka bynta kine ki 24 kynta kiban wan.
Ka jingiap ki briew bad ki Longing ba shah ktah
Ar ngut ki briew kila duh noh ia la ka jingim namar ka jingsniew jong ka suinbneng bad kine ki jingjia kila jia hapoh jong ka East Khasi Hills district.
Kine ki dei u Bah Klosliya Kharkongor, 50 snem ka rt ba shong basah ha ka shnong Lumkyntung hapoh jongka Laitkroh–Khatarshnong Block, la khlad na ka jingtwa khyndew.
Ha kawei pat ka jingjia u Samborlang Tariang 35 snem ka rta, uba na ka shnong Mawbynna, Pomlakrai ula khlad na ka jingngam jyllop. Kine baroh arngut kila khlad hynne ka sngi Thohdieng bad kila don ruh 3 ngut ki briew kiba kynthup ia 2 ngut ki heprit kiba la mynsaw malu mala.
Ka sorkar kala bthah ba dei ban pyllait noh mardor ia ka jingai jingiarap kaba T. 4 lak kum ka Ex-Gratia Compensation sha ki bahaiing bahasem jong kitei kiba la khlad noh.
Ki jingpynjulor ha kylleng ki District
Palat 1,000 ngut ki briew na ki 25 tylli ki shnong kila shah ktah jur na ka jingsniew jong ka suinbneng kaba la pynmih ia ka jingshlei um, ka jingtwa khyndew bad ka jingshah pynjulor jong ki jingtei. Ka thain East Khasi Hills kadei ka jaka kaba la shah ktah jur bha, ha kaba 14 tylli ki shnong kila shah ktah bad kala don ka jingjulor jong ki surok, ki iing bad ki jaka paidbah, ka jingkhyllem ki dieng bad ka jingtwa khyndew ha ki 5 tylli ki jaka.
Haba kyllum lang baroh, ki don 18 tylli ki iing kiba la shah pynjulor ha kylleng ki district kiba kynthup ia ka West Garo Hills, South West Garo Hills, East Jaintia Hills, West Jaintia Hills bad Eastern West Khasi Hills.
Ki jingtei kiba la shah pynjulor ki kynthup
Hynniew tylli ki surok, kawei ka skul bad ar tylli ki dukan ka East Khasi Hills.
Kawei ka skul ha West Garo Hills.
Ki surok bad ki sainar bording elektrik ha South West Garo Hills.
Hynriew tylli ki sainar elektrik ne KV Line, ar tylli ki surok, ka skul bad ka ophis sorkar ha East Jaintia Hills.
Ka jingtwa khyndew ha ka surok Baghmara–Moheskhola ha South Garo Hills.
Hukum u CM ban shimkhia mardor ia ki kam
Namar ka jingmih kynsan jong kine ki jingjia, u Myntri Rangbah ula pynmih ia kine ki jingbthah:
Ki District kidei ban phiah ha ki Zone ban pynbeit ryntih ia ka rukom ai jingiarap haba wan lynshop ka bor mariang.
Baroh ki bor pyniaid district kidei ban long kiba husiar bad kiba peitngor ia ki jaka kiba don jingma.
Dei ban ai jingiarap mardor ia ki longiing kiba shah ktah.
Baroh ki ophisar kidei ban don ha la ki jaka treikam ha ki Headquarter kaba kidei ban don.
Ka Meghalaya Energy Corporation Limited (MeECL) kala shah bthah ba kadei ban ialeh ban pynbiang mardor ia ka bording elektrik bad ban pynbun iaki nongtrei haba donkam.
Ki bor pyniaid district kidei ruh ban shimkhia ban nym don ka jingthud ha ka leit ka wan bad ban pyniar ia ka jingai jingkyrshan ia ki nongleit nongwan kiba sahkut.
Jingbthah ia ki paidbah
Ka State Disaster Management Authority (SDMA) bad ka District Disaster Management Authorities (DDMA) ki dang khmih bniah ia ka jinglong jingman bad kila pynkhreh bad pynbiang ia ki lad ban ai jingshakri.
La bthah ia ki nongshong shnong ba kin long kiba ioh ia ki jingtip, ban shim ia ki lad jingiada bad ban long kiba la pynkhreh namar ka jinglong ka suinbneng ka lah ban kan nang jur ha kine ki 24 kynta kiban wan.
Haba ka Meghalaya ka dang pynkhreh ban pdiang shuh shuh ia u slap, ki bor sorkar kila shimkhia bad trei borbah ban tehlakam ia ki jingjulor bad ban iada ia ki jingim bad ka sorkar ka iengskhem ruh ha ka nongrim ban pynbiang ia ki jingai jingiarap ha ka por kaba biang na ka bynta kito baroh kiba shah ktah.
