Lum ka NESO ia ka Executive Council ha Guwahati | Pynleit jingmut ha jingrung ki mynder, NRC bad hok ki trai muluk

Guwahati, August 06: Ka North East Students’ Organisation (NESO) kala lum ia ka jingialang jong Executive Council ha Guwahati ha ka sngi Balang, ia kaba la pynlong da ka All Assam Students’ Union (AASU) ha Hotel Prag Continental.

Ha kane ka jingialang la wan ban iashimbynta da ki nongialam jong ki snegbhalang kiba paw ha ka thain Shatei Lam Mihngi jong ka ri kynthup ia ka NESO bad u Chief Advisor ka AASU u Dr. Samujjal Bhattacharya bad u President ka AASU u Utpal Sarma.

Haba iakren bad ki nongpathai khubor hadien ba la wai ka jingialang, u Dr. Bhattacharya ula pynpaw ia ka jingsngewkhia halor ka ki mat kiba dang sahteng jong ka thain khamtam eh ha kaba iadei bad ka jingwan rung kyrthep ki briew kiba nabar, ka jingbym lah ban pynbeit ia ka jingiakynad hapoh ka jylla Manipur bad ka jingdonkam ban ithuh ha ka riti synshar ka ri ban iada kyrpang ia ki jaidbynriew riewlum.

Ki mat kiba kongsan ha ka jingialang jong ka NESO:
Ka jingwan rung kyrthep ki briew kiba nabar:
Ka NESO kala iengskhem halor ka jingdawa kaba dang sahteng ban lap ban pynduh bad ban pynphai biang noh ia ki briew kiba la wan rung be-aiñ na ka ri Bangladesh.

“Ka jingwna rung kyrthep ki briew kiba nabar kala buh ha ka jingma kaba khraw ia ka jinglong tynrai bad ia ka jingdon jong ki jaidbynriew riewlum ha ka thain” ong u Dr. Bhattacharya haba bynrap ba ka sorkar kala pulom ha kaban shimkhia thikna ia kane ka mat.

National Register of Citizens (NRC):
Ka NESO kala ban jur ba ka jingpyntreikam ia ka NRC hapoh ka jylla Assam kaba la maitphang bad khmih da ka iingbishar Supreme Court kam shym la long kaba pura.

U Dr. Bhattacharya ula ong ba ka NESO sa shisien kan sa leit mudui sha ka iingbishar ban dawa ba ia ka NRC dei ban pyntreikam ha baroh kawei ka thain Shatei Lam Mihngi jong ka ri ban iada ia ka jinglong jingman jong ki jaidbynriew riewlum.

Jingiakynad ha Manipur:
Ka NESO kala pynpaw ia ka jingsngewkhia kaba jur halor ka jingiai bteng jong ka jingiakynad ha Manipur, u Dr. Bhattacharya ula ong ba ka jingsuk kala duh noh ha ka jylla wat hadien 2 snem jong ka jingiakynad. “Ka jingiaumsnam ka dei ban kut noh. Ka jingsuk jingsain kadei ban wanphai biang hapoh ka jylla Manipur” ula kyntu.

Ka jingkyndang ia ki mynder ri ha ka jylla Assam: 
Ka NESO kala ai jingkyrshan ia ka sorkar Assam halor ka jingkyndang ia ki briew kiba la leit kyntur pud ha ki jaka jong ka tnad Forest bad ula pynpaw ba ym dei ban ailad iano iano ruh ban shong ban sah be-aiñ hapoh khlaw. “Kane ka kam ka dei ban iaid shakhmat khlem kano kano ka jingshah pynwit” pynpaw kane ka kynhun sengbhalang jong ki samla.

Citizenship Amendment Act (CAA): 
Ka NESO kala pynpaw ia ka jingpyrshah kaba jur halor ka CAA bad kala dawa ba dei ban pynduh pyndam pura noh ia kane ka ain. Ha ryngkat bad ka jingkubur ba ka CAA kam treikam ha ki jaka ba don ka Inner Line Permit (ILP) bad ha ki thain kiba don ka Sixth Schedule kynthup ia ki 6 tylli ki jylla bad 8 tylli ki district jong ka jylla Assam, ka NESO kala ong ba kane kam pat biang satia bad kala dawa ba dei ban weng noh ia ka jingpyntreikam ia kane ka ain ha ka thain baroh kawei.

Ki Jaidbynriew Chakma ha Arunachal Pradesh:
Ka seng kala kular ruh ba kan ai jingkyrshan bad ban ialeh ban pynbeit ia ka jingeh kaba mad da ki jaidbynriew Chakma hapoh ka jylla Arunachal Pradesh bad ka kular ban iengskhem bad ka jingdawa kaba hok ka jongki.

‘Mission 40’ ban kyrshan ia ki samla ka NE kiba thmu ban pyndep ia ka Civil Services
Da ka jingthmu ban kyntiew bad pynkupbor ia ki samla ka thain, ka NESO kala pynbna ba 40 ngut ki samla pule na kylleng ki bynta jong ka thain shatei lam mihngi kaba kynthup 26 ngut na ka Assam bad 14 ngut na kiwei pat ki jylla yn sa phah sha Delhi ban pynkhreh ia ka eksam Civil Services lyngba ka prokram ai jinghikai kaba kyrpang. Kane ka jingthmu kaba la ai kyrteng Mission 40, ka thmu ban sei ia ki heh ophisar kiba tbit na ka thain shatei lam mihngi.

Ka NESO kala mynjur ruh ia ka Resolution ban pynjur ia ki jingiakhih ha ka thain baroh kawei ban pynbor ia ka sorkar pdeng ha kaban ai ia ka jingiada kaba kyrpang lyngba ka riti synshar ka ri na ka bynta ki jaidbynriew riewlum.

“Kane kam dei tang ka jingdawa hynrei kadei ka jingkular” la ong Dr. Bhattacharya.