Nongpoh, Nailar 23: Ka Myntri Sorkar Dr. Ampareen Lyngdoh hynne ka sngi Balang, kala lum ia ka jingialang ba kyrpang bad ki 5 ngut ki MLA ka Ri-Bhoi District lem bad ki Ophisar jong ki Tnad bapher bapher, ban iaphylliew jingmut kumno ban kyntiew ia ka rep ka riang bad ruh ban pynbit pynbiang ia ki jingduna kiba bun kiba don ha ki jaka sumar hapoh ka District.
Ia kane ka jingialang la pynlong ha Nongpoh bad la wan iashimbynta da u MLA ka Jirang Bah Sosthenes Sohtun uba dei ruh u Chief Whip ka Sorkar Jylla, u MLA ka Nongpoh Bah Mayralborn Syiem, MLA ka Mawhati Bah Charles Marngar, MLA ka Umroi Bah Damanbait Lamare, MLA ka Umsning Dr Celestine Lyngdoh, u Deputy Commissioner lem bad ki Ophisar ka tnad ka Koit ka Khiah bad ka Tnad kam rep.
Kane ka jingialang kaba la iaid bun bun kynta, kala iatai halor kiba bun ki mat kiba iadei bad ka Tnad ka Koit ka Khiah lem bad ka Tnad kam rep.
Haba iakren bad ki nongthoh khubor, ka Kong Ampareen kaba khmih ia ka Tnad ka Koit ka Khiah bad ka Tnad kam rep, kala pynpaw ia ka jingkmen ban ioh iaphylliew jingmut halor kiba bun ki mat bad ki MLA lem bad ki Ophisar ka District, ban lah pynjanai ia ka jingshakri jong ka Sorkar Jylla.
U MLA ka Nongpoh Bah Mayralborn Syiem ula pyntip ba ka jingiakren kala iaid sani bha halor ki sienjam ba dei ban shim ha kaban pynbit pynbiang ia ki jaka ai jingsumar naduh ki CHC, PHC bad Sub Centre bad ban pynioh ia ki dawai dashin ha ka pork aba biang.
Halor ka kam rep kam riang, u pyntip ba ka jingiakren kala mih ban nang pynbun ia ki processing unit bad ka jingithuh ia ka kam rep sohtrun khnang ban kyntiew ia ki nongrep bad ka ioh ka kot ki nongrep.
Kiwei ki MLA, ki la ai khublei ia ka jingshimkhia jong ka Kong Ampareen Lyngdoh kum ka Myntri ba dei khmieh ia ka tnad ka Koit ka Khiah bad ka kam rep kam riang ka jylla, kaba kloi ban sngap ia ki jingeh ba don ha kine ki tnad treikam sorkar bad ruh ban thaw lad kumno ban weng ia ki jingeh, ban kyntiew ia ki jaka sumar bad ka rep ka riang kiban long ki jingkyrkhu na ka bynta ki paidbah nongshong shnong jong ka district hi baroh kawei.
Pule ruh: Leit tynruh ki Nonghikai Deficit ia u CM ban pyntreikam noh ia ki jingdawa
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
