Shillong, Naiwieng 07 : Ka Hynniewtrep Youth Council (HYC) ha ka sngi Palei, kala pynlong ia ka jingialang paidbah ha Motphran ban pynsngewthuh ia ki paidbah halor ka jingdonkam ban iakhun thma pyrshah ia u droks bad ban kyrpad ia ka Sorkar ba kan shim da ki sienjam ba tyngeh ban tehlakam ia ka jingwan rung une u jingdih buaid ha Jylla.
Ka HYC kala dawa ia ka Sorkar ban buh ia ka kynhun Pulit ba kyrpang ha kaban iakhun pyrshah ia ki kam bymman ba mih na u droks bad ban seng ia ki Rehabilitation Centre ha kylleng ka Jylla.
Kala dawa ruh ban wanrah noh ia ka Ophis ka Narcotics Control Bureau (NCB) ha Jylla namat ka jingbym lah shaniah bad artatien ia ka jingdonkti ki Pulit ha ka jingiakhun pyrshah ia ki kam khaii droks ha Jylla.
Kane ka jingialang paidbah kala sakhi ia ka jingpahara kaba jur bha jong ki Pulit kiba la rah iala ki tiar ki tar naduh ki shield bad ki lathi ban pynneh ia ka suk ka sain ha ka thain.
La iohi ruh ba bun ki dukan khamtam ki dukan jong ki bar jylla, kila khang khyrdep lut naduh ka thain Motphran shaduh ka thain Khyndailad.
Ka HYC kala maham ia ka Sorkar ba lada kam lah ban leh eiei halor ki jingdawa, ka seng ka lah ban nang pynjur ia ka jingiakhih bad lah ruh ban wan iakhih hakhmat ka Secretariat.
