Shillong, Nohprah 17: Ka Estimates Committee jong ka Meghalaya Legislative Assembly, hapoh ka jingialam jong u Chairman Bah Mayralborn Syiem uba long u MLA ka Nongpoh constituency, ula lum ia ka jingialang bad ki heh ophisar ha ka 16 tarik u Nohprah ha Conference Hall jong ka Meghalaya Legislative Assembly, Shillong.
Ka jingthmu jong kane ka jingialang ka long ban khmih bniah ia ka jingiaid shakhmat jong ki kam kiba iadei bad ka tnad Pule puthi, ka koit ka khiah, Public Health Engineering (PHE) bad ka tnad Community & Rural Development (C&RD).
Ha kane ka jingialang la wan ban iashimbynta da u Bha Renikton Lyngdoh Tongkhar (Mawkyrwat MLA), Bah Adelbert Nongrum (North Shillong MLA), Remington Gabil Momin (Rambrai-Jyrngam MLA), Bah Wailadmiki Shylla (Jowai MLA) bad ka Miani D Shira (Ampati MLA) ryngkat bad ki ophisar jong ka Meghalaya Assembly Secretariat bad na ki tnad bapher bapher.
Ki mat kiba kongsna kiba la iatai ha ka jingialang ki kynthup ia ka jingkhmih bniah ia ka jingpyniaid shakhmat ia ki 3 tylli ki Block Institutes of Teacher Education (BITE) bad ki Residential School. Kala kyntu ia ka tnad pule puthi ba kadei ban pynkloi ha kaban shna pyndep bad ban pyntreikam noh ia ki Eklavya Model Residential Schools (EMRS) ha Ri-Bhoi bad ha East Garo Hills hapoh jong u snem 2025.
Ha kaba iadei bad ka Tnad PHE (Jal Jeevan Mission), ka committee kala banjur ia ka jingdonkam ban pyntreikam sani bha ia ka Jal Jeevan Mission (JJM) ha ki thaiñ khappud bad la bthah ia ka tnad ban shimkhia ia ki lad ban pynkloi ia ka kam bad ban aiti ia ka kaiphod kaba pura.
Halor ka koit ka khiah bad ki MCH Hospitals, ka committee kala khmih ia ka jingpyniaid shakhmat ia ka Maternal and Child Health (MCH) hospital kaba thymmai ha Nongstoin bad Umsning, ha kaba la buh ia ka thong ba dei ban sdang pyntreikam noh hapoh u snem 2025. Kala kyntu ruh ba dei ban shimkhia mardor ban kyntiew ia ki jingdonkam ha ki Civil Hospital, Primary Health Centres (PHC) bad Community Health Centres (CHC).
Halor ka tnad Community & Rural Development (C&RD), ka Committee kala khmih bniah ia ka jingtei thymmai ia ka Block Development Officer (BDO) office, ha kaba la shim ruh ia ki jingtip ba ki kam ki jam kiba la iaid shakhmat kila kynjoh sha ka 70-80% bad kala kyntu ia ka tnad ba kadei ban pynthikna ba dei ban pyndep ia ka projek ha ka por kaba la buh ban kyntiew ia ka jingai jingshakri lyngba ki C&RD Block.
U Bah Mayralborn Syiem ula pynpaw ia ka jingsngewhun ha kaba iadei bad ka jingiaid shakhmat jong kitei ki projek baroh bad ula ong, ba ka Committee ka khmih lynti ban iohi ba ka jingiatai kaba la long ha kane ka sngi bad ki tnad bapher kan dei kaba la pyntreikam thikna.
