Nongpoh, Risaw 03: U Myntri Khynnah ka Ministry of Communication Devanish Chauhan, ha ka sngi Ba-ar ula wan lum jingtip na ki bor District ka Ri-Bhoi halor ka jingpyntreikam ia ki skhim bapher bapher jong ka Aspiration District, bala mang kyrpang da ka Sorkar Pdeng.
Une u Myntri Khynnah uba la wan iuhkjat ha ka sien ba nyngkong eh ha Ri-bhoi, ula lum ia ka jingialang bad ki Bor District lem bad ki Ophisar jong ki Tnad bapher bapher ban ioh jingshai halor ka jingpyntreikam ia ki skhim.
Ia kane ka jingialang la pynlong ha Conference Hall ka Ophis u Deputy Commissioner bad kiba la iashimbyna ha ka jingialang ki kynthup ia u u Deputy Director General Sanjeev Sharma, Deputy Commissioner Arpit Upadhyaya, u Superintentent of Police Giri Prasad lem bad kiwei kiwei.
U Deputy Commissioner u la ia ki jingbatai halor ka jingpyntreikam ia ki skhim pynroi kiba la mang katkum kane ka programme jong ka Aspirational District kaba la nang treikam shaid shaid ha ki tnad treikam ba kynthup ia ka tnad ka Koit ka Khiah bad Nutrition, ka tnad Pule Puthi, ka tnad Agriculture-Horticulture, Veterinary, Rural Development, Water Resources bad kiwei kiwei.
Haba kren hadien kane ka jingialang, u Devunish Chauhan kum u Myntri ka sorkar pdeng u la pynpaw ia ka jingkmen kaba khraw ban sakhi ba ki skhim pynroi na ka Aspirational District ha Ri Bhoi, ki long kiba iaid beit iaid ryntih bad da ka jingtreishitom jong ki ophisar bapher bapher hapoh ka jinglamkhmat u DC ka long shisha kaba I hun bad kaban pynmyntoi ia ki paidbah.
U la pynpaw ruh, ba ka sorkar pdeng ba la lamkhmat da u Narendra Modi kum u Myntri Rangbah Duh ka Ri India u ba la sdang ia ka prokram Aspiration District ban pynmang skhim pynroi ba kyrpang halor ka jingiohi ia ka jingdon jong ki District hapoh ka Ri India kiba dang sahdien bha.
U Myntri u la ai jingiaroh ruh ia u Myntri Rangbah ka Jylla Meghalaya u Conrad K Sangma, u ba la trei shitom ban pyn urlong ia ki jingthmu ka sorkar pdeng da kaba ai ruh ia ki lad jingiarap ha kiba bun ki bynta ban pynurlong ia kane ka Aspirational District Programme ha kaba u don ka jingkyrmen ruh ba ka sorkar jylla kan nang iai kyrshan ia kane ka jingthmu ban kyntiew ia ki district ba dang sahdien da kaba kyntu ruh ia ki ophisar ba kin nang treishitom ban pynjop ia kane ka programme.
Hadien kane ka jingialang, u Myntri ka Sorkar Pdeng u la leit ruh ban jurip ia ka Aganwadi Centre bad ka Prime Hub jong ka IVCS kaba don hapoh ka shnong Mawtnum.
