Kren khunlung khynnah ka VPP ba phah hiar shuki ia ki Nongialam ka MDA
Shillong Jylliew 05: Ka seng saiñ pyrthei National People’s Party (NPP) kaba ialam ia ka sorkar jylla, shen kan sa shong bishar bniah halor ka result elekshon Lok Sabha 2024 ban lap ia ka daw tynrai halor ka jingbym lah ban leh bha ka seng ha ka elekshon.
Ka Agatha K Sangma ka para trai jong u Myntri Rangbah ka jylla u Conrad K Sangma, kala shah pynrem kput ha u MLA ka Congress na Gambegre u Saleng A Sangma da palat 1.55 lak vote.
Ka Agatha kala ioh palat 2.28 lak vote na ka 8 lak tam ki nongthep vote ha ka Tura Parliamentary Constituency kaba kynthup ia ki 24 tylli ki Assembly constituency jong ka jylla.
Katba ha ka Shillong Parliamentary Constituency, ka Myntri Sorkar ka Kong Ampareen Lyngdoh kala wan balai, ha kaba u Bah Ricky AJ Syngkon na ka seng Voice of the People’s Party ula pynrem kput ia u MP ba laisien ka jylla u Bah Vincent H Pala na ka seng Congress da palat 3.7 lak vote, kaba dei syndon ka rekod kaba heh tam ha ka jylla.
Haba iakren bad ki nongthoh khubor, u President ka NPP Meghalaya u Bah Prestone Tynsong ula ong, “Ngi pdiang ia ka rai jong u paidbah la ka long ha Tura ne Shillong Lok Sabha Seat”.
Ula pyntip ba ka seng shen ka Party kan sa lum ia ka jingialang ban khmih bniah halor ka jinglong jingman na ka jingmih ka result kaba dang shu dep khnang ba kan ioh ban pynbeit ia kiei kiei baroh.
“Ngi ngin sa ia khmih bniah bha, ngin sa wad ia ki daw tynrai jong ki jingduna bad ki jingbakla bad kumta ngin sa shim ia ki sienjam kiba kongsan. Ka jingrem ia ka elekshon la ka dei da ka vote kaba rit ne kaba heh kam don jingiapher eiei, shisien ba la rem hi ka mut ba la rem, shisien ba la jop hi ka mut beit ba lah jop. Kumta ka seng ka jong ngi kan sa shong jingialang shen, ngin sa iatai sani bad ban wad bniah bad hadien kata ngin sa shim ia ki sienjam kiba donkam ban pynbeit bad ngin sa shim ruh ia ki sienjam kiba tyngeh” ong u Bah Prestone.
“Baroh ki nongialam bad ki nongkitkam ka seng haduh ha ki Block, kila trei shitom bha hynrei ngi la rem pat.Kumta ngi burom ia ka rai kaba la shim da u paidbah bad ngi hap ruh ban sngewthuh ia kawei ba kam mut ba ngi mynta, ha ka elekshon ban wan ruh ngin rem noh. Ka elekshon kadei ka elekshon ia kaba ngi hap ban pdiang, ym tang ba ngin pdiang ia ka jingshah rem hynrei ngi hap ruh ban pynkhiah bha ia ka. Ngi hap ban khmih bniah bad ngi hap ban khmih biang ia ka rukom treikam jong ka seng bad ia iwei pa iwei ha man la ki MLA ne MDC constituency” ong u President ka NPP.
Ha kaba iadei bad ka jingdawa u President ka VPP u Bah Ardent Basaiawmoit ba baroh ki nongialam ka MDA kidei ban hiar shuki noh naka sorkar, u Bah Prestone uba long ruh u Symbud Myntri Rangbah ka jylla ula ong, ba katei ka jingkren ka long tang ka jingkren khunlung khynnah.
“Nga tharai ngin ia leit phai biang naduh ka por ba ngi la ioh ia ka jinglaitluid kum ka ri India, nga khlem iohi ba ka histori kna jia ba kino kino kiba ialam ia ka sorkar kin hap ban hiar shuki noh. Ka long kaei kaei ka bym iahap satia bad ka jingkren khunlung khynnah da u President badon burom jong ka VPP. Nga tharai ula dei ban peit shwa ia ka histori bad udei ban ai ia ka nuksa kaba shai kdar ia nga ia kaba jia kum katei ka jingjia ha ka histori ha ka ri bad katkum ka jingtip ka jong nga hi, kam shym la don kano kano ka histori kaba la jia naduh ka sngi kaba nyngkong kaba ngi la ioh ia ka jinglaitluid haduh mynta ha kino kino ki jylla ne wat haka sorkar pdeng ha Delhi” ong u Bah Prestone.
U Bah Tynsong ula kynthoh ruh ia u Bah Basaiwmoit halor ka jingkam ba ka VPP kan mih bujli noh ha ka jaka jong baroh ki seng riewlum ha ka jylla Meghalaya.
“Nga ieh ha ka jingstad jong ki nongthep vote namar lada kren shaphang ka jingmih bujli ha ka kam politik kum ka seng saiñ pyrthei kam don satia kano kano ka mat jong ka jingkut. Ngam tharai uno uno u nongialam na kano kano ka seng saiñ pyrthei yn shu ong ba mynta ngi dei ban klet noh ia ka HSPDP, UDP bad ba kin leit pyniasoh noh bad ka VPP.
Nga tharai kadei katei ka khubor kaba u kwah ban pynsaphriang. Ia nga hi, ngam don eiei ban ong halor katei ka jingkynthoh namar kan shong beit ha ka UDP, HSPDP ne kiwei pat ki seng saiñ pyrthei la ki kwah ne me ban leit pyniasoh noh bad ka VPP. Ia katei ka jingkylli phi donkam ban leit kylli na ki nongialam jong kitei ki seng saiñ pyrthei” la ong u Bah Prestone.
Ha kaba iadei bad ka jinglah ka seng Congres ban knieh ia ka jingjop na Tura Parliamentary Seat hadien 47 snem, u President ka NPP ula ong ba ha ka politik, ka seng saiñ pyrthei kam dei kaba longtrai da ka longiing longsem ne jongno jongno.
