New Delhi, Jylliew 04: Ka kynhun National Democratic Alliance kaba ialam da ka seng BJP hynne ka sngi kala thaw histori da kaba long ka kynhun synroplang kaba jop laisien lynter ha ka elekshon MP Lok Sabha hapoh ka ri.
Ha kane ka sngi kaba khraw, u Myntri Rangbah duh ka ri u Narendra Modi ula pynpaw ka jingsngewnguh ia ki paidbah ka ri halor ka jingieid bad ka jingshaniah ka jongki ia ka NDA.
Haba pynpaw haka rynsan social media X (kaba ju tip mynshwa kum ka Twitter), u Modi ula thoh, “Ki paidbah kila ai ka jingshaniah ia ka NDA na ka bynta laisien linter! Kane kadei ka history hapoh ka ri.
Nga nguh ia ki Janata Janardan ne ia kiba bun ki paidbah, ia kane ka jingieid bad nga pynthikna ia ki ba ngin bteng ban trei ia ki kam kiba bha kumba ngi la leh ha ki 10 snem kiba la leit ban pynurlong ia ka jingangnud jong ki paidbah. Nga ‘Salute’ ruh ia ki Karyakarta ne ki Nongtrei, kiba la trei shitom bha. Ki kyntien kin ym lah ban ai ia ka hok halor kaj ingtrei shitom kaba khraw ka jongki”.
U Modi mynta yn ia ryngkat ka rekod bad u Jawaharlal Nehru ban shah pynsmai laisien lynter kum u Myntri Rangabhduh ka ri India.
Ha kawei pat ka liang, ula ai khublei iakipaidbah jongka Odisha halor ka jingshaniah ia ka seng da kaba ong, “Kadei ka jingjop kaba khraw na kabynta ka ynshar khaddar kaba bha bad ban rakhe ia ka kolshor ba phyla jong ka Odisha. Ka BJP kan trei shitrhem ha kaban ialeh ban pynurlong ia ka jingangnud jong ki paidbah bad ban rah shajrong ia ka Odisha ha ka roi ka par”.
Ka BJP kan thaw ia ka sorkar ha Odisha ha ka sien kaba nyngkong eh hadien ba kala jop bun ha ka elekshon sha ka ïingdorbar thawaiñ jong ka Odisha bad kumba ka long haduhmynta, ka BJP kala jop ha ki 70 tylli ki Constituency bad kala tam ha ki 8 tylli ki Constituency ha ka ïingdorbar thawaiñ ka Odisha kaba don 147 ngut ki dkhot.
