Mahendraganj, Lber 27: U Myntri Rangbah ka jylla u Conrad K. Sangma hynne ka sngi Balang ula pan ia ka jingkyrshan na ki paidbah ban jied biang ia ka Agatha K. Sangma ha ka sien kaba saw.
Haba kren ha ka jingialang ialap elekshon ha ka thaiñ Salmanpara, ha Gopinatkilla bad ha Chapahati, u Conrad Sangma ula kyrpad ia ki nongthep vote ban kyrshan ia ka NPP halor ki matti bad ki kambah kiba la leh mynshwa da u Kpa jong u (L) PA Sangma.
“Kum u Myntri Rangbah haba nga leit sha Delhi, nga ioh ia ka jingithuh namar ka jing noh synniang u Kpa jong nga ha ka kam politic. Ka para ka jong nga ka Agatha Sangma kala long MP ka Tura lai sien bad kala pynsngew ia ki jingeh ym tang jongka Meghalaya bad ka Thaiñ Shatei Lammihngi hynrei na ka bynta ki trai riewlum bad ki Khristan” ula ong ba ki nongialam ha Delhi kila shah shkor ia ka sur ka jongka.
Ula ai khublei ia u Myntri Rangbahduh ka ri u Narendra Modi bad ia ka BJP kaba la ai jingkyrshan ia ka Agatha kum ka kyrtong.
U National President ka NPP u Conrad Sangma ula ong “U Myntri rangbah duh ka ri u Modi ula pyni ia ka jingburom ia ka kyrtong ka jong ngi ka Agatha Sangma bad ula pyni shai kdar ia ka jingieid bad jingburom kaba ki don na ka bynta u Kpa jong nga uba la khlad noh bad ia ka Para ka jong nga. Nga ai khublei kyrpang ia u Myntri Rangbahduh ka ri bad ia u Myntri Kam pohiing ka ri bad ia ki nongialam ka BJP”.
Ula iaroh ia u Modi ia ka jingshimkhia ban kyntiew Sted ia ka roi ka par ha ka thaiñ shatei lammihngi bad ula ong ba u Myntri Rangbahduh ka ri ula don ia ka jingiohi jngai na ka bynta ka lawei jong ka ri bad ha ka jingkiew jong ka ri ka jylla kan don ia ka bynta kaba khraw.
“Ka India kala iaid shakhmat bad shen ngin sa kylla long ka ri kaba khlain ka ioh ka kot ha ka pyrthei bad haba ka India kala kylla long ka ri kaba khlain ha ka ioh ha ka pyrthei, ka Meghalaya kan don byntalang ha ka khana jong ka jingkiew irat” la png u Conrad.
Ha kaba iadei bad ka elekshon u Conrad ula pan ia ka jingiatreilang na ki nongthep vote ban pynkhlain ia ka NPP ha ka jylla bad ula pyntip haka jingialang ba ka NPP kala lah ban pyniaid shakmat ia ki matban kyntiew ia ka jylla bad ka lah ruh ban sdang ia ki kam pynroi ha kylleng jong ka jylla.
“Kane ka elekshon ka long kaba kongsan ban bteng ia ki khana jong ki kam pynroi ha ka Meghalaya bad ban pyni ia ka jingshaniah ki paidbah ia ka NPP bad iak I nongialam jongka” ula ong bad ka ai khublei ia ki nongthep vote kiba la pynjop baroh arsien ia ka NPP ha ka elekshon MLA ha ka jylla.
“Ka lyer jong ka NPP ha kylleng ka Meghalaya ka khlain bha bad ka sur jong ka NPP kadei ban sawa jam, kaba shai bad kaban iohsngew hapoh ka Lok Sabha,” la ong u Conrad bad ka iathuh ba ka jingshna ia ka surok na Mahendraganj sha Heli ha West Bengal lyngba ka ri Bangladesh.
Ha ka katei ka jingialang la iadonlang ka kyrtong MP ka NPP ka Agatha K. Sangma, ki MLA kiba kynthup ia u Sanjay Sangma, Ian Botham Sangma bad ka Kurim jong u (L) P.A. Sangma ka Soradini K. Sangma.
U Myntri Rangbah ula ai jingkren ruh ha ka rynsan ialap elekshon ha Gopinatkilla, Chapahati, Tungrurchar, Daspara bad Nandichor ha South West Garo Hills.
Ka Agatha K Sangma kala pan ia ka jingkyrshan na ki paidbah da kaba ong, “Ki paidbah kidei ban vote ia ka NPP bad ban pyni iaka jingshaniah skhem ha ka jingialam jong u Conrad K. Sangma. Kum ka MP, ngan bteng ban pynsawa ia ka sur jong phi hapoh ka Parliament bad ban rah ia ki mat jong ki paidbah na ka bynta ban kyntiew ia ka jylla Meghalaya bad ia ka ri”.
Ha ka jingialang hynne ka sngi Balang, u CEM barim ka GHADC bad u nongialam ka BJP U Dipul Marak, uba la mih na ka seng ula wanphai biang sha ka seng NPP katba ha ka jingialang ha Mahendraganj, u paralok uba iajan bad u (L) PA Sangma, u Mohammad Abul ula resainnoh na ka TMC bad ula pyniasoh noh bad ka NPP.
 PA Sangma.){kind=link}