New Delhi, Jylliew 05: Ki heh nongialam ka BJP kiba kynthup ia ka Smriti Irani, Arjun Munda, Ajay Mishra Teni bad u Kailash Chaudhary ki dei kiwei napdeng ki 13 ngut ki Myntri ka sorkar pdeng kiba la mad ia ka jingrem haka elekshon MP Lok Sabha 2024.
Ka jingrem ka BJP ha ki jaka ri thor kiba kongsan kala pynlong syndon ia ka BJP ba kan ap khmih lynti ban ioh iaka jingkyrshan bad jingiatreilang na kiwei pat ki seng saiñ pyrthei ban ioh thaw ia ka sorkar.
Ka Smriti Irani kadei ka MP jongka Amethi Lok Sabha Seat da kaba pynrem ia u Rahul Gandhi ha u snem 2019, hynrei mynta ka kynti kala shah pynliem noh ha u kyrtong ka Congress u Kishori Lal Sharma, uba dei u nongialam uba iajan bha bad ka longing jong ki Gandhi ha kaba ula jop da 1,67,196 vote.
Ha Kerala, ha ka Thiruvananthapuram constituency, u Myntri khynnah ka sorkar pdeng u Rajeev Chandrasekhar ula shah pynrem ha u kyrtong ka Congress u Shashi Tharoor, da 16,077 vote.
U Myntri khynnah ka sorkar pdeng uba khmih ia ka Home Affairs u Ajay Mishra Teni, uba la mad ia ka jinglehraiñ na ka jingshah kem u khun jongu ha ka jingjia ha u Risaw 2021 ha Lakhimpur Kheri, ula mad noh ia ka jingrem ha u kyrtong ka Samajwadi Party u Utkarsh Verma da 34,329 vote, ia kaba ka SP kala iakhun da kaba iatreilang bad ka seng Congress ha ka elekshon MP Lok Sabha.
Ha West Bengal, ha Bankura constituency, u Myntri khynnah ka sorkar pdeng uba khmih ia ka pule puthi, u Subhas Sarkar ula shah pynrem ha u kyrtong ka Trinamool Congress u Arup Chakraborty da 32,778 vote.
Ha Jharkhand, u Myntri ka sorkar pdeng uba khmih ia ka Tribal Affairs u Arjun Munda ula shah pynrem noh ha u kyrtong ka Congress u Kalicharan Munda da 1,49,675 vote.
Ha dien 12 kynta jong ka jingniew vote kaba la sdang naduh ka por 8 baje mynstep, ka BJP kala jop ne kala tam ha ki 240 tylli ki Constituency kum ka seng kaba heh paid tam hynrei kam hsym la kynjoh shuh sha ka 303 Seat kumba kala jop ha ka elekshon MP Lo kSabha ha u 2019.
Ki kynhun kiba iatreialng bad ka BJP kiba kynthup ia u N Chandrababu Naidu jongka TDP bad u Nitish Kumar’s JD(U) kila tam ne jop ha ki 16 bad 12 tylli ki constituency ha Andhra Pradesh bad Bihar.
Ka BJP lada ka ioh iaka jingkyrshan kaba pura na ki dkhot kiba donlang haka kynhun NDA kan kynjoh sha ka thong ban ioh thaw iaka sorka NDA.
