Delhi, Jylliew 04: U President ka Congress Mallikarjun Kharge hynne ka sngi Baar, ula ong ba u soh ba mih na ka elekshon Lok Sabha 2024 kala pyni shai kdar ba ka long pyrshah ia u Myntri Rangbah duh ka ri u Narendra Modi.
Ula ong ba ki paidbah ka ri India kila jied ia ka Congress bad ia ka kynhun I.N.D.I.A ban ieng iada ia ka riti synshar ka ri.
“Ka seng Congress kala mad ia kiba bun ki jingeh bad jingtynjuh ha kaba la pynsnageh treikam ne ‘Freeze’ ia ki Account jong ka Congress bad kiba bun ki jingthombor. Wat hapdeng kitei ki jingeh, ka seng kala iengskhem ha ka jingkular ka jongka ban iada ia ka riti synshar ka ri” la ong u Kharge.
Haba iakren bad ki nongthoh khubor ha nongbah Delhi ban ai khublei ia ki paidbah kiba la ai ka jingshaniah iaka kynhun kaba ialam da ka Congress.
“Ka jingialap elekshon ka Congress ka long halor ki ishu kiba kongsan kum ka jingbym iohkam iohkam, ka roi ka par bad ki paidbah kila pyni ba ki don iaka jingshaniah ha ngi” ula ong.
Ka Congress kala kynnoh ba ka sorkar NDA kala pyndonkam da ki buit shukor, kynthup ka jingkem ia ki Myntri Rangbah bad ka jingpyndonkam bakla ia ka bor da ki tnad sorkar.
U Rahul Gandhi ula pynpaw ia ka jingsngewnguh ia ki paralok kiba don lang ha ka kynhun.
“Ka jingiakhun ka long ban iada ia ka riti synshar ka ri. Nga ai khublei ia ki paralok kiba donlang ha ka kynhun. Ngi la shim ia ka sienjam kaba nyngkong eh ban iada ia ka riti synshar ka ri” ong u Rahul.
“Ka seng Congress kan iengskhem ha kaban shimkhia mardor halor ka mishon ban shimkhia ia ki mat kiba kongsan bad ban pynneh pynsah iaka jinglong kordor jongka jong ka kam synshar paidbah watla kala mad ia ki jingeh kiba bun ha ka por ialap elekshon” ula ong.
Halor ka jingkylli la ka seng kan thaw ia ka sorkar, u Rahul ula jubab da kaba ong, “Ki paralok kiba don lang ha ka kynhun kin iakynduh lashai ka sngi bad kin sa shim ia ka rai kaba khatduh”.
