Nongstoiñ, Ïaïong 11: Ka seng FKJGP-Rambrai Circle hynne ka sngi Ba-ar, kala leit pan jingpynshai na u Deputy Commissioner halor ka jingwan poi jong kawei ka kompani bym tip kyrteng ha Rambrai, kaba la wan pynpoi ia ki machine bad ki tiar ki tar ban ksam ia ka mei ramew.
Ka FKJGP kala shim ia kane ka sienjam hadien ka jingwan jurip ia ka jaka treikam jong kane ka kompani kaba don hajan jong ka shnong Mawiawtep, kaba don kham pajih naka surok Rambrai-Mawdoh.
Ha kane ka jingjurip, ka FKJGP kala lap ba kane ka kompani kala wanrah ruh ia ki nongbylla bar jylla sha ka thain hynrei ia kine ki nongbylla la pynkynriah kyrkieh noh da ki kali sha kiwei pat ki jaka ki bym lah satia ban tip. La ong ba ka seng lap tang ia uwei u nongniah iaka machine bad u nongiarap ki bym lah satia ban ai jingpynshai wat ia ka kyrteng jong ka kompani.
Namar kane, ka FKJGP kala leit ban iakynduh ia u DC ban pan jingshai la u don ne em ia kano kano ka jingtip shaphang ka jingwan ki kompani ban ksam marpoh khyndew ha ka thain.
U President ka FKJGP-Rambrai bah Jiedstarland Lyngkhoi haba ïakren bad ki nongthoh khubor hadien ba mih na kamra u DC, u la ong ba halor ka jingpan jingshai jong ki, na ka liang u DC u la ong ba haduh mynta um pat ïoh jingtip ei ei shaphang katei ka jingthmu ban wan ksam marpoh khyndew.
Namar kata, u ong ba ka seng ka la kyntu ïa u DC ba lada u la ïoh jingtip kaba bniah, un sngewbha ban pynshai lem sha ki paitbah ba kadei ka Kompeni aïu, namar lada ki kynja Kompeni kin shu wan ksam ïa ki marpoh khyndew khlem ka jingtip ki shnong ki thaw bad ki bor synshar hima ne ka District Council, ka lah ban buh ha ka jingeh kaba khraw ïa ki paitbah bad wat ïa ka mariang bad ka jingkoit jingkhiah jong ki nongshong shnong ruh.
