Nongstoiñ, Jylliew 25: Ka WKSU ka la leit tynruh ïa u Deputy Commissioner ka West Khasi Hills ba un shimkhia lem halor ka roi ka par, ki kam sahteng hapoh ka District ba kynthup ïa ka Polytechnic, ITI, District Jail ka District Library bad Auditorium ka building ba thymmai jong Sibsing Memorial Govt skul, ka MCH nalor kiwei kiwei.
Ka WKSU ka la pynkynmaw ïa une u khlieh nongsynshar ka District ba un ïai budien ïa kitei ki mat kiba sahteng, kiba dei ki mat na ka bynta ki jingmyntoi jong ki paidbah khamtam ïa ki samla pule jong ka thaiñ.
Ha ka jingïakren bad u DC Nongstoiñ, u la pynpaw ba na ka liang jong u, u la shimkhia ban thoh sha ki bor ba halor ba kin leh ia kaba donkam.
U la pyntip ruh ba u jukhot na ka por sha ka por ïa ki ophisar kiba dei peit ha ki tnad treikam bapher bapher, ban pynthikna ba ki kam pynroi kim dei ban sahteng hynrei ban trei kam shait shait.
