Leit theh ka HYC ia u niut ka Iew Rambrai ha phyllaw ka Ophis u Syiem

Nongstoiñ, K’lyngkot 04: Ka seng Hynñiewtrep Youth Council (HYC) Rambrai ha ryngkat bad ka HYC-WKH, ha ka sngi saitjaiñ, ki la khat ia ki ñiut ba shu kynton sah hajan ïew Rambrai bad leit theh syndon ha phyllaw jong ka Ophis u Syiem ka Hima Rambrai.

Ka HYC kala shim ia kane ka sienjam namar ka jingkynnoh sngap mynthi u Syiem bad ka Dorbar Hima ia ka jingud jingnam ki paidbah halor ka jingieh lyngkrang ia ki niut bala kynton kum u lum hajan ka Iew Rambrai mynta la bun bun snem.

Kane ka Seng hapoh ka jingialam u President samla Drowel Lyngdoh Mawdoh bad u General Secretary samla Kwahsisjune Nongphud, kala hiar ha Iew Rambrai rynkat ka kali ban kit ia u niut bala kynton hajan kane ka Iew sha ka phyllaw ka Ophis u Syiem ka Hima.
Haba kren sha ki lad pathai khubor, kine ki nongialam sengbhalang kila pynpaw ba ka jingieh pathar bad lum thup ia ki niut ha katei ka iew, kala ktah ia ka rup ka rong jong ka iew khamtam eh ia ka koit ka khiah ki paid nongshongshnong bad ki nongshong iew.

U samla Drowel Lyngdoh Mawdoh ula iathuh ba ka HYC kala ioh pdiang ia ka jingujor man ka por halor ka jingkynton une u niut bad kaba sngewlyngngoh la kynnoh ba u Syiem um patiaw satia ia ka jingeh ki paidbah bad kyntait ruh ban iakren iasyllok bad ki sengbhalang ne ki paidbah.

U iathuh ba ka Seng kala leit iakynduh ia u Syiem Rambrai ban dawa kit noh ia une u niut uba la pynisait met bad kala dawa ia ka Ophis u Syiem ba kan pynkhuid noh kloi kloi. U iathuh ba ka seng kala dep aipor teng, kaba la kut noh ha ka 30 tarik Nohprah 2025, hynrei la kynnoh ba u Syiem ula sngap mynthi bad leh bym patiaw satia.

U ong ba dei namar kane, ka seng kala shim ia ka sienjam ban leit khat ia une u niut najan kane ka Iew bad sa leit theh ha phyllaw ka Ophis u Syiem khnang ba un sngewthuh ia ka jingjynjar kaba ki paidbah ki mad baroh shikatta.

Ka seng HYC kala kren shai ba kane ka jingleit theh niut ka dei tang ka dak hynrei lada u Syiem u dang sngap mynthi, ka seng kam banse ban shim sa da kiwei pat ki sienjam kiba kham tyngeh. U ong ba lada u Syiem um pynkhuid noh ia une u niut, ka seng ka long kaba kloi ban leit pynkhuid bad ia ki niut baroh, yn sa theh ha Ophis u Syiem.