Shillong, K’lyngkot 19 : U Myntri Rangbah ka Jylla Conrad K Sangma hynne ka sngi Nyngkong ula leit sngewlem bad ai khublei khatduh ia u Rev Dr Rieweh Robert Cunville uba la khlad noh ha ka 17 tarik u Kyllalyngkot, da kaba leit sha ka iingsah jongu une u nongialam niam ba pawnam ha ka pyrthei kaba don ha Upper Lachumiere.
U Myntri Rangbah ula pynpaw ha ka rynsan Social Media ka jong u da kaba thoh ba u Rev Dr Cunville udei u u briew uba aiti lut ha u Blei, ula shakri da ka jingdon ia ka jingngeit kaba khlain bad ba kohnguh, uba im ka jingim kaba don ka jingngeit mynsiem kaba jylliew bha.
“U Rev Cunville u dei u briew uba aiti lut ha u Blei, u shakri da ka jingkhlain ha ka jingngeit bad uba kohnguh, uba la aiti da ki phew snem ka jingim ban pynsaphriang bad ialap ia ka Ktien u Blei ha kylleng ka thain Shatei Lam Mihngi bad shabar ri” ong u Conrad.
U Myntri Rangbah ula pynpaw ruh halor halor ka jingiadei ka jongu Rev Cunville bad ka Ministry u Billy Graham bad ka jingngeit kaba khlain, ka jingsngewrit bad ka jingieid ia ki briew, kaba la ai mynsiem ia ki riewshimet ki bym lah ban khein shuh.
“Ka nam jongka jingshakri bad ka jingaiti lut jong u kan dang iai im lyngba ki jingim kiba bun kiba ula ktah,” ong u CM Sangma, haba phah ia ka jingsngewlem ia kiba ha iing ha sem bad kiba ieid ba thoin jong u Rev Dr Cunville.
Kumban shu kdew, u Rev. Dr. Rieweh Robert Cunville uba long u nongialam niam Khristan ba pawnam ha ka pyrthei ula khlad noh hapdeng ka jingshah sumar hapoh ka NEIGRIHMS ha ka sngi Saitjain bad ka jingleit on tep don burom ia u kan long lashai ka sngi Baar ha u Lum jingtep ka Balang Presbyterian Laitumkhrah.
U Rev Dr Cunville ula khlad noh ha ka rta kaba 86 snem bad udei u khun jong I (L) Dr R.L. Cunville bad (L) Kong Felicia Kharshiing bad la kha ia u Dr Cunville ha ka 15 tarik u Lber 1939 ha Tezpur, Assam.
U dei u Pastor uba la pawnam bha ym tang hapoh jong ka ri India hynrei ha ka pyrthei hi baroh kawei bad udei uba la trei borbah ha kaban leit ban ialap bad pynsaphriang ia ka ktien u Blei ha kylleng ki ri.
Ula pule ia ka BD bad M.Th. na Serampore University ha u snem 1958-65 bad hadien kata ula pyndep ruh ia ka MA (Missions) na Fuller Theological Seminary USA ha u snem 1975.
La pynkyntang ia u da ka KJP Synod ha ka snem 1966 bad ula wanrah ia ka kyrteng sha ka Balang Laitumkhrah ha ka snem 1998.
Ula long u Nonghikai ha ka Cherra Theological College, Sohra bad ula trei 4 snem kum u Youth Secretary ka National Council of Churches bad long ruh u Pastor ha ka Union Chappel Calcutta 4 snem.
Ha ka snem 1977 u Dr Billy Graham ula khot sngewbha ia u Pastor Cunville ban iatreilang bad haduh mynta u dang trei bad ka Billy Graham Evangelistic Association ban ialap sha kylleng ka Pyrthei ia ka jingieit bah u Blei ha u Jisu Khrist.
Haba u Blei ula khot noh sha lade ia u Dr Billy Graham, u Rev Dr R.R. Cunville ula shah jied ban duwai ha ka sngi ba ontep ia u.
Ha ka snem 2010 ula shah jied kum u President ka United Bible Societies bad la jied biang ia u ha ka snem 2016 sa na ka bynta 6 snem. Ha ka snem 2023 ula shah jied pat kum u President ka Emeritus United Bible Societies (UBS).
