Agartala, Nailur 25:Ha ka jingjia ia kaba la iohi kum ka jinglehrain ia ka sorkar synshar Bharatiya Janata Party (BJP), arngut ki nongialam bala rim ka BJP kiba kynthup ia u MLA barim u Burba Mohan Tripura kila leit ban pyniasoh ia lade bad ka party TIPRA ha kane ka janmiet sngi Thohdieng ba la lah, kata da kaba pynkut noh ia ka jingiadei bad ka BJP.
Ka Gauri Shankar Reang, kaba dei ka sitting Block Advisory Committee Chairman (ka post ba la shu sieh) bad ruh ka Symbud Lamphang barim ka Tripura Legislative Assembly ruh kala leit ban pyniasoh bad ka TIPRA ha ka jingiadon lang u Pradyot Kishore Debbarman.
Kane ka jingmih noh na ka party synshar BJP shwa ka jingpynlong ia ka ilekshon assembly ha ki bnai sdang jong u snem 2023 la iohi ba ka la long ka jingjah burom kaba khraw ia ka party synshar ha ka jylla.
Kane ka jinglong jingman kala wan long ruh ha ka por ba ki heh nongialam ka BJP kum u Sambit Patra bad u BL Santosh kila don ha kane ka jylla.
Kham hashwa uwei pat u nongialam ba la rim ka BJP, u Hangsha Kumar Tripura uba dei u nongialam jong ki trai shnong ula leit ban pyniasoh ia lade bad ka TIPRA, kata khyndiat sngi shwa ka jingwan poi jong u national president ka BJP u JP Nadda ha kane ka jylla.
Haba kren sha ki lad pathai khubor, u khliehduh ka TIPRA, uba dei ruh u nonghiar pateng na ka longiing syiem, u Pradyot Kishore Debbarman ula ong, “Baroh kine ki nongialam bala rim kila wan pyniasoh bad ka party jong ngi khlem kano kano ka jingbuh kyndon.Baroh na kine kila wan pyniasoh bad ka party ban ai ka jingkyrshan halor ki mat kiba ngi iakhun pyrshah.”
