Shillong, Nohprah 18: U MDC ba shu sieh (Nominated MDC) ka UDP ha ka Khasi Hills Autonomous District Council (KHADC) u Bah Bindo M Lanong hynne ka sngi ula rai ban leit kyrshan noh iaka Executive Committee (EC) ba lamkhmat da u Chief Executive Member (CEM) Bah Pyniaid Sing Syiem.
Haba kren sha ki lad pathai khubor u bah Bindo u la ong ba kane ka rai ban kyrshan ia ka EC kaba ialam da ka NPP ha KHADC, kadei kaba ula shim hadien ba ki nongialam jong ka United Democratic Party (UDP) ki la leh lyndet bad iaid lait ia u.
“Nga la rai ba lashai ka 19 tarik Nohprah ngan sa phah ia ka shithi jong nga ba ngan ai noh ka jingkyrshan sha ka Executive Committee (EC) kaba ialam ka NPP ha KHADC” ong u bah Bindo.
U Bah Bindo u la pynpaw ia ka jinglyngngoh ba na ka liang ki nongialam jong ka UDP kim shym la khot ne wer lem ia u sha ka jingialang jong ka General Council watla bun sien kila pynpaw ba un iai donkam bad ka Party.
“Nga sah lyngngoh bha halor kane ka jingleh ki nongialam ka UDP, khamtam ba nga dei kum u trai bad nongseng ia ka party hynrei ki khlem khot ia nga sha kane ka jingialang.” Ula ong
“Naduh ba nga rung sha ka sain hima sima ha u snem 1972, ngam pat ju kyntiap seng shano shano bad nga neh ha kajuh ka seng naduh ba ka dang dei ka APHLC-HPU bad mynta kaba la tip kum ka UDP. Ka seng ka kylla kyrteng hynrei nga khlem kylla shano shano ruh,” ong u bah Bindo.
