Shillong, Naiwieng 05: Ka Meghalaya Tribal Teachers’ Association (MeTTA) jong ka skulbah NEHU hynne ka sngi kala wan ban ai jingkyrshan iaki samla pule kiba la sdang iaka jingshah thngan khlem pud sngi hakhmat ka Administrative Block ka NEHU.
Ha kane ka sngi, la ïohi ba ki Nonghikai kila wan ban khublei kti iala ki samla pule kiba la sdang ban shong kyllain mungor hakhmat ka khyrdop jong ka Administrative Block.
Haba kren shaki lad pathai khubor, u President ka MeTTA Dr DRL Nonglait u la ong “Hadien ba u Vice Chancellor (VC) barim Prof SK Srivastava u la mih noh na kane ka skulbah, ngi khmih lynti ba kiei kiei kin kham bha hynrei ka jingwan rung jong u Prof PS Shukla ka long man da khongpong”.
U Dr Nonglait u la ong ba haka jingshisha ki Nonghikai kila pyrshang shibun ban ioh ia u briew na la ka jong ka jaitbynriew ban shah thung kum u VC jong ka NEHU hynrei kane kala pulom.
“Ngim shym la lah ban leh ei ei bad ngi la hap ban pdiang ia u Prof Shukla da kaba pyrkhat ba un leh ei ei ban kyntiew ia ka kyrdan jong kane ka skulbah bad ban leh ia kiei kiei na ka bynta ka jingbha jong ki samla pule bad ki nongtrei jong kane ka skulbah ba pawnam ym tang hapoh ka thaiñ Shathei Lam Mihngi (North East). Ka jingwan u Prof Shukla kum u VC ka la nang pynhiar iaki kyrdan jong ka pule puthi” u la ong.
U la ong ba ka jinglong jingman mynta ka long ba ki samla pule ki hap ban iakhih na ka por sha ka por, ki Nongtrei lane ki Non-Teaching taff ruh ki hap ban pynlong jingiakhih na ka por sha ka por.
“Naduh ka 5 tarik Naiwieng ki Non-Teaching ki la sangeh treikam bad mynta ka sngi ki samla pule ki la shim ia ka rai ban shah thngan khlem pud sngi. Naka liang ka MeTTA haba ngi tip ba ki samla pule mynta ki iakhih bad dawa ban weng noh ia u Registrar bad 3 ngut ki Deputy Registrar, ngi la rai ban ai ka jingkyrshan ia ka NEHUSU bad ïa baroh ki samla pule” u la bynrap.
