Shillong, K’lyngkot 09 : U Heh Pulit Bah Gabriel K Iangrai uba shah sospon halor ki jingkynnoh bamsap, ula leit ban mudui sha Iingkashari Supreme Court ban ioh bah jamin hynne ka sngi nyngkong.
Ia kane la pyntip da u Nongiasaid Ain jong u Bah Gabriel u Adv Phuyosa Yobin uba la iathuh ruh ba ka Supreme Court kala phah notice halor ka jingpan bah jamin jong une u Heh Pulit.
Lah ban kdew hangne ba ha ka 2 tarik Naiwieng 2022, u Bah Gabriel uba shakri kum u Commandant ka SF-10 battalion, ula shah kem halor ka jingpyndonkam bakla ia ka pisa bala mang ban pyntrei ia ka National Emergency Response System (NERS) building ha Sadar police station, Shillong. Namar kane, ka Sorkar Jylla kala kurup noh ia ka Bank Account jong u.
U Yobin, Nongiasaid Ain u Bah Gabriel ula pyntip ba ka Iingkashari Supreme Court kala pynmih ia ka notice bad buh ia ka Tarik ban shong bishar.
“Shuwa kane, ia kane ka jingpan bah jamin la kyntait haduh arsien da u Special Judge bad ruh ka Iingkashari Meghalaya High Court, kaba la pynbor ban leit pan bah jamin na Iingkashari Supreme Court” ula pyntip.
U Bah Gabriel ula don hapoh ka police custody naduh ka 5 tarik Naiwieng bad la pynkynriah ia u sha ka Judicial Custody naduh ka 12 tarik Naiwieng. Ka para jong u, kala pan ia ka bah jamin na ka bynta jong une u Heh Pulit ha Iingkashari Meghalaya High Court hynrei la kyntait ia ka.
