Shillong Risaw 11: U Myntri Rangbah ka jylla u Conrad K Sangma, hynne ka sngi Palei, ula leit jurip ia ka shnong Purakhasia bad ia ki shnong kiba marjan ban peit iaka jinglong jingman na ka jingshah ktah ha ka jingshlei um.
U Myntri Rangbah ula lum iaka jingialang bad ki heh ophisar na ka District bad na ka Block ha Purakhasia Block Office kaba don ha Puran Bazaar bad ula iakynduh ruh ia ki nongshong shnong bad pynthikna ia ki ba kin ioh lut ia ka jingkyrshan na ki bor pyniaid district bad na ka sorkar jylla.
U Myntri Rangbah ula ong ba nalor ki iing, kila don ruh ki pung dohkha, ki jingthung jingtep bad ki jaka rep soh kiba la shah pynjulor bad ula ong, ba ka tnad Agriculture bad Horticulture bad kiwei pat ki tnad sorkar kin sa trei na ka bynta ban ai jingiarap ia kitei kiba shem lanot.
Ula leit ruh ban jurip ia ki jaka kiba don hajan jongka wah ha Purakhasia bad ula leit ban jurip iaka jingkieng kaba la tei halor ka wah Grim kaba pyniasoh ia ka shnong Wagigitok bad ka Akimpara.
Ha ka shnong Aikinpara bad Posenggagre u Myntri Rangbah ula lum ia ka jingialang paidbah ha kaba ula sngap bad shah shkor ia ka jingpynpaw ia ka jingsngewkhia bad ula pynthikna ban ai ia ka jingiarap na ka sorkar bad na ki heh ophisar.
Ula leit ruh ban jurip ia ka jingkieng Thallang kaba don ha Angalangre bad ula leit jurip ia ka jingkieng kaba la khyllem noh ha ka shnong Rimrangpara kaba don halor jong ka wah Norang.
